அதானி என்னை சந்திக்கவும் இல்லை; பார்க்கவும் இல்லை

பா.ம.க. புகாருக்கு சட்டசபையில் முதல்வர் ஸ்டாலின் விளக்கம்

பொதுவெளியில் தவறான தகவலை பரப்பி தமிழக அரசுக்கு களங்கம் கற்பிக்க முயற்சி நடப்பதாக முதலமைச்சர் மு.க. ஸ்டாலின் கூறினார். அதானி என்னை ஒருபோதும் சந்திக்கவில்லை என்றும், நான் அவரை பார்க்கவும் இல்லை என்றும் குறிப்பிட்டார்.

அதானி நிறுவனம் தயாரித்து மத்திய அரசுக்கு வழங்கும் மின்சாரத்தை வாங்க வேண்டும் என்பதற்காக பல்வேறு மாநிலங்களின் அதிகாரிகளையும், ஆட்சியாளர்களையும் அதானி சந்தித்து ரூ.2,200 கோடி வரை கையூட்டு கொடுத்ததாக அமெரிக்க புலனாய்வு அமைப்பு குற்றம் சாட்டியது.

ஏனென்றால் இந்தியாவில் சூரிய மின்சக்தி நிறுவனங்களை அமைக்க அமெரிக்காவில் அதானி நிறுவனம் நிதி திரட்டியது. அந்த நிதி மூலம் கையூட்டு கொடுத்ததாக குற்றம் சாட்டப்பட்டு அமெரிக்க நீதிமன்றத்தில் வழக்கும் தொடுக்கப்பட்டது.

அந்த வகையில் தமிழக மின்வாரியமும் மத்திய அரசிடமிருந்து மின்சாரத்தை பெற்றதாக அமெரிக்க புலனாய்வு நிறுவனம் கூறியிருப்பதாக செய்தி வெளியானது. இது இந்திய அரசியல் வட்டாரத்தில் பரபரப்பை ஏற்படுத்தியது.