રિવરફ્રન્ટ પર ગુનાખોરીનું સામ્રાજ્ય: ત્રણ યુવકને છરાના ઘા મારી લૂંટી લીધા

સીસીટીવી કેમેરા વગરના રિવરફ્રન્ટ પર પોલીસ ગુનાનો ભેદ ઉકેલવામાં પાછી પડે છેઃ લૂંટારુઓ યુવકોને અંધારાંમાં લઈ ગયા અને મોબાઈલ-રોકડ રકમ છિનવી લીધા

અમદાવાદ, શુક્રવાર

અમદાવાદ શહેરની ઓળખ બની ગયેલા રિવરફ્રન્ટ પર હવે જાણે ગુનાખોરીનું સામ્રાજ્ય ફેલાઈ ગયું હોય તેવું લાગી રહ્યું છે. રિવરફ્રન્ટ ઉપર બાઈક ચોરી, ચેઇન સ્નેચિંગ, વહેલી સવારે સાઇક્ટિંગ કરી રહેલી વ્યક્તિઓને લૂંટી લેવાના અનેક બનાવ સામે આવ્યા છે ત્યારે હવે રિવરફ્રન્ટ પર તીક્ષ્ણ હથિયારના જોરે માર મારીને લૂંટી લેવાની ઘટના પણ વધી રહી છે. રિવરફ્રન્ટ પર મોડી રાતે ત્રણ યુવકને છરાના ઘા મારીને ત્રણ મોબાઈલ અને રોકડ રકમ બે શખ્સ લૂંટ ચલાવીને ફરાર થઇ ગયા હોવાનો કિસ્સો સામે આવ્યો છે. ત્રણ યુવકને રિવરફ્રન્ટ પર અંધારામાં લઈ જઈને ધાકધમકી આપી હતી. આ મામલે પોલીસે ગુનો નોંધીને તપાસ શરૂ કરી છે. રિવરફ્રન્ટ પર હજારો લોકો આવતા હોય છે ત્યારે આ કિસ્સો લાલબત્તી સમાન છે. બીજી તરફ લૂંટના કિસ્સા બાદ પોલીસ આરોપીની તાત્કાલીક ધરપકડ કરે તેવી પણ લોક માગણી ઊઠી છે.