એક કરોડના એન્ટિક દાગીના સસ્તામાં આપવાનું કહી ૬૫ લાખની છેતરપિંડી

શાતિર ઠગ ટોળકીએ સોનીને નિશાન બનાવ્યોઃ પ્લાસ્ટિકના ડબામાં સોનાનો ઢોળ ચઢાવેલા નકલી દાગીના પધરાવી દીધા

અમદાવાદ, ગુરુવાર

સાવ સસ્તામાં સોનાના એન્ટિક દાગીના ખરીદવાની લાલચ શહેરના એક વેપારીને બહુ ભારે પડી છે અને તેમણે રૂપિયા ૬૫ લાખ ગુમાવવાનો વારો આવ્યો છે. મણિનગરમાં રહેતા સોનાના વેપારીને એક કરોડની કિંમતના સોનાના એન્ટિક દાગીના ૬૫ લાખમાં ખરીદવાની લાલચ આપીને શાતિર ઠગ ટોળકીએ આબાદ ફસાવ્યો હતો. વેપારી પાસેથી ૬૫ લાખની રોકડ રકમ પડાવી લીધા બાદ પ્લાસ્ટિકના ડબામાં નકલી દાગીના પધરાવીને ત્રણ ઠગ ફાર થઇ ગયા હતા.

મણિનગરના આનંદ આવાસ એપાર્ટમેન્ટમાં રહેતા મેહુલ સોનીએ ત્રણ શખ્સો વિરુદ્ધ ઠગાઈની ફરિયાદ નોંધાવી છે. મેહુલ માણેકચોક ખાતે સોના-ચાંદીનો વેપાર કરે છે. મેહુલ ગુજરાતના વિવિધ વેપારીઓ માટે સોના-ચાંદીના દાગીના બનાવવાનું કામ કરે છે. ઉપરાંત તે સોનાના દાગીના અને લગડી વેચવાનું પણ કામ કરે છે. મેહુલ સોના-ચાંદીના દાગીનાના વેપાર માટે અલગ અલગ વેપારીઓને મળતો હોય છે. આ જ રીતે પંકજ ઠુમ્મર સાથે તેની મુલાકાત થઇ હતી. પંકજ મેહુલના દાગીના પોતાના સર્કલમાં વેચીને કમિશન લેતો હતો. સમય જતા બને વચ્ચે ગાઢ મિત્રતા થઈ ગઈ હતી. તેઓ એકબીજાના ઘરે પણ આવતા જતા હતા.