કમોસમી વરસાદથી શાકભાજીના ભાવ ફરી આસમાનેઃ ગૃહિણીઓ ત્રાહિમામ્

બિપરજોય વાવાઝોડાના કારણે શાકભાજીને મોટું નુકસાનઃ બહારથી આવતાં શાકભાજીની આવકમાં પણ ભારે ઘટાડો

અમદાવાદ, સોમવાર

રાજ્યમાં વારંવાર થઇ રહેલા કમોસમી વરસાદના કારણે શાકભાજીના ભાવ પર માઠી અસર થઈ છે. મોટાભાગનાં શાકભાજીનાં ભાવમાં ૩૦થી ૩૫ ટકાનો વધારો થયો છે. ભાવ વધવાના કારણે ગૃહિણી ત્રાહિમામ્ પોકારી ઊઠી છે. આ વર્ષે બેવડી ઋતુના કારણે મોટાભાગે શાકભાજીના ભાવ ઉપર અસર પડી રહી છે. એવામાં કમોસમી વરસાદ અને છેલ્લે આવેલા બિપરજોય વાવાઝોડાને લઈને શાકભાજીમાં ભારે નુકસાન પણ થયું હોવાના કારણે મોટાભાગે શાકભાજીના ભાવ વધ્યા છે. કમોસમી વરસાદના કારણે બહારથી આવતાં શાકભાજીની આવકમાં ઘટાડો થયો છે. કમોસમી વરસાદના કારણે શાકભાજીમાં પાકમાં ૩૦થી ૩૫ ટકા નુકસાન થયું છે. ટામેટાં માર્કેટમાં પહેલાં ૨૦ રૂપિયા કિલો મળતાં હતાં. તે અત્યારે ૪૦ રૂપિયા કિલો વેચાઈ રહ્યાં છે ત્યારે આદું માર્કેટમાં ૩૦૦ રૂપિયા કિલો વેચાઇ રહ્યું છે, કારણકે મોટાભાગે આદુંની આવક બેંગલુરુંથી થાય છે.