હાશકારોઃ ગુજરાતમાં મેઘતાંડવનું જોર ઓછું થશે

છેલ્લા ૨૪ કલાકમાં સુરતના કામરેજમાં સૌથી વધુ પોણા ચાર ઈંચ તો રાજ્યમાં કુલ ૭૧.૬૭ ટકા વરસાદ વરસ્યો

અમદાવાદ, મંગળવાર

ગુજરાતમાં વરસાદના ત્રીજા રાઉન્ડે ઠેર ઠેર મેઘતાંડવ સર્જીને લોકોને રીતસર ત્રાહિમામ્ પોકારાવી દીધો હતો. ખાસ કરીને સૌરાષ્ટ્ર અને દક્ષિણ ગુજરાતમાં મેઘરાજાએ ભારે તારાજી સ હતી. સામાન્ય જનજીવન અસ્તવ્યસ્ત થઈ ગયું હતું અને હજુ પણ કેટલાંક સ્થળોએ લોકોની રોજબરોજની જિંદગી પાટા પર ચઢી નથી. મેઘરાજાને ખમૈયા કરવાની પ્રાર્થના લોકો કરી રહ્યા હોઈ જાણે કે તેની અસર થઈ હોય તેમ હવે સમગ્ર રાજ્યને હાશકારો થાય તેવા સારા સમાચાર મળી રહ્યા છે, જે મુજબ આજથી રાજ્યમાં વરસાદનું જોર ઘટવાનું છે.

સમગ્ર રાજ્યમાં વરસાદના ત્રીજા રાઉન્ડે હાહાકાર મચાવ્યો હતો. જૂનાગઢ અને નવસારી જેવા વિસ્તારમાં તારાજીનાં કરુણ દૃશ્યો જોવા મળ્યાં હતાં. જૂનાગઢમાં તો અતિભારે વરસાદે એવો કહેર વર્તાવ્યો હતો કે સમગ્ર જૂનાગઢ શહેર જાણે કે દરિયામાં ફેરવાઈ ગયું હતું. રોડ પર ગાડીઓ, વાહનો, પશુઓ અને લોકો તણાયા હતા. આવા મેઘકહેરથી હચમચી ઊઠેલા જૂનાગઢમાં હવે પાણી ઓસરી રહ્યાં છે તો તારાજીનાં અનેક કરુણ દૃશ્યો સામે આવી રહ્યાં છે. એ જ પ્રકારે નવસારી શહેરની પણ અતિભારે વરસાદે દુર્દશા કરી મૂકી હતી.