દિલ્હીમાં ફરી પૂરનો ખતરોઃ યમુનાની સપાટી ભયજનક નિશાન ૨૦૫.૩૩ મીટરને પાર

હથનીકુંડ બેરેજમાંથી પાણીનો જંગી જથ્થો છોડાતાં સ્થિતિ વધુ ગંભીર

નવી દિલ્હી, બુધવાર

રાજધાની દિલ્હીમાં એક વાર ફરી પૂરનો ખતરો મંડરાવા લાગ્યો છે. હિમાચલ પ્રદેશ અને ઉત્તરાખંડની પહાડીઓમાં સતત મુશળધાર વરસાદને કારણે યમુનાનું જળસ્તર ફરી વધવા લાગ્યું છે. દિલ્હીમાં નદીનું જળસ્તર ૨૦૫.૩૩ મીટરની ભયજનક સપાટીને પાર કરી ગયું છે. જેના કારણે ફરી એકવાર દિલ્હીના લોકોના હૃદયના ધબકારા વધી ગયા છે. સેન્ટ્રલ વોટર કમિશનની વેબસાઈટ અનુસાર, મંગળવારની રાતે ૧૦ વાગ્યે જૂના લોહા પુલ પર જળસ્તર ૨૦૫.૩૯ મીટર નોંધાયું હતું.