ફ્રાન્સમાં પીએમ મિશેલ બાર્નિયરની સરકાર ત્રણ મહિનામાં તૂટીઃ સંસદમાં અવિશ્વાસ પ્રસ્તાવ પસાર

રાષ્ટ્રપતિ મેક્રોંને રાજીનામું સોંપશેઃ પ્રથમ વખત પીએમને અવિશ્વાસ પ્રસ્તાવ દ્વારા દૂર કરવામાં આવ્યા

ફ્રાન્સમાં ગઈ કાલે બુધવારે એક મોટો ચોંકાવનારો રાજકીય ઘટનાક્રમ જોવા મળ્યો હતો. વિરોધ પક્ષોના સાંસદોએ ફ્રાન્સની મિશેલ બાર્નિયર સરકારને ઊથલાવી દીધી હતી. આ સાથે યુરોપિયન યુનિયનની બીજી સૌથી મોટી આર્થિક શક્તિ ગણાતા ફ્રાન્સમાં રાજકીય સંકટ વધુ ઘેરું બન્યું છે. અવિશ્વાસનો મત હારી જતાં ફ્રાન્સની સરકાર પડી ગઈ છે. ફ્રાન્સનાં છેલ્લાં ૬૦ વર્ષના ઈતિહાસમાં આ પહેલીવાર છે, જ્યારે કોઈ સરકારને આ રીતે હટાવવામાં આવી હોય. ફ્રાન્સના ઈતિહાસમાં આ પ્રથમ વખત બન્યું છે કે સંસદમાં અવિશ્વાસ પ્રસ્તાવ પસાર થવાને કારણે કોઈ વડા પ્રધાન સત્તા ગુમાવી રહ્યા હોય.

ઉલ્લેખનીય છે કે, ડાબેરી NFP ગઠબંધન દ્વારા રજૂ કરવામાં આવેલા અવિશ્વાસ પ્રસ્તાવના પક્ષમાં કુલ ૩૩૧ સાંસદોએ મતદાન કર્યું હતું, જ્યારે સરકારને તોડવા માટે માત્ર ૨૮૮ વોટની જરૂર હતી.

ફ્રાન્સમાં ત્રણ મહિના પહેલા જ બનેલી પીએમ મિશેલ બાર્નિયરની સરકાર બુધવારે પડી ભાંગતા સમગ્ર વિશ્વમાં તેની ચર્ચા શરૂ થઈ છે. ફ્રાન્સની સંસદમાં પીએમ બાર્નિયરની સરકાર સામે અવિશ્વાસ પ્રસ્તાવ પસાર થયો હતો. હવે તેમણે તેમની સમગ્ર કેબિનેટની સાથે રાષ્ટ્રપતિ ઈમેન્યુઅલ મેક્રોંને રાજીનામું સોંપવું પડશે.