ન્યૂ યરની ઉજવણીમાં ડ્રગ્સ પાર્ટીને રોકવા પોલીસ મેદાનમાંઃ પેડલર્સ સહિતના માફિયા પર બાજનજર

ડ્રગ્સ પર વાર એ જ પોલીસનું સાચું અભિયાનઃ પોલીસ ઠેરઠેર વોચ અને ચેકિંગ કરીને તપાસ કરશે

વર્ષ ૨૦૨૪ને બાયબાય કરવામાં અને વર્ષ ૨૦૨૫ને આવકારવા માટે યુવાઓ થનગનાટ કરી રહ્યા છે તેવા સમયે શહેરમાં કોઇ શરાબ અને ડ્રગ્સની પાર્ટી ના થાય તેની સંપૂર્ણ જવાબદારી પોલીસના શીરે છે. ડ્રગ્સના મામલે ગુજરાતે હવે પંજાબને પણ પાછળ છોડી દીધું છે. યુવાઓ એમડી, કોકેન, હેરોઇન, ગાંજો, ચરસ, કફ સિ૨૫ સહિતના ડ્રગ્સના રવાડે ચઢીને પોતાનું ભવિષ્ય બગાડી રહ્યા છે, ત્યારે પોલીસ યુવાઓને બચાવવા માટે તેમજ ડ્રગ્સ માફિયાઓને ઝડપી પાડવા માટે એડીચોટીનું જોર લગાવી રહી છે.

ક્રિસમસના તહેવારને હવે ગણતરીના દિવસો બાકી રહ્યા છે, ત્યારે પોલીસ અને સુરક્ષા એજન્સી, ડ્રગ્સ ડીલર્સ તેમજ પેડલર્સ સહિતના લોકોને ઝડપી પાડવા માટેની ખાસ ઝુંબેશ શરૂ કરાઈ છે. આ સિવાય કોમ્બિંગ નાઇટ ગોઠવીને ડ્રગ્સ તેમજ દારૂની હેરફેરને રોકવા માટેના પ્રયાસ શરૂ કરી દેવાયા છે.

ડ્રગ્સ પર વાર એ જ પોલીસનું સાચું અભિયાન હોય તેવું લાગી રહ્યું છે, કારણ કે પોલીસ તેમજ સુરક્ષા એજન્સી રાત દિવસ એક કરીને ડ્રગ્સ માફિયાને ઝડપી રહી છે. ક્રિસમસનો તહેવાર નજીક આવી રહ્યો છે ત્યારે શહેરમાં નબીરાઓ ડ્રગ્સ પાર્ટી કરે તેવી શક્યતા નકારી શકાતી નથી.