లెక్చరర్లే స్వీపర్లు స్టూడెంట్లే అటెండర్లు!

ప్రభుత్వ కాలేజీలకు వేలల్లో.. ప్రైవేటుకు లక్షల్లో చేరుతున్న విద్యార్థులు

ఇదీ రాష్ట్రంలో ప్రభుత్వ జూనియర్ కాలేజీల దుస్థితి

గంటకొట్టే పని ప్రిన్సిపలే

బాలికలకు బాత్రూంలు సైతం లేవు

శుభ్రత కరవైన కాలేజి గదులు

కనీస సౌకర్యాలు లేని కళాశాలలు

హైదరాబాద్, అక్టో బరు 26, ప్రభాతవార్త: రాష్ట్రంలోని ప్రభుత్వ జూనియర్ కాలేజీలు కనీస సౌకర్యాలు, సిబ్బంది కొరతతో సతమతమవుతున్నాయి.చివరికి కొన్ని కాలేజీల్లో ఎంపీసీ, బైపీసీ క్లాసులను చెప్పడానికి లెక్చరర్లు కూడా లేరు. దీంతో రాష్ట్రంలో పూర్తిగా ఉచిత విద్యను అందిస్తున్నప్పటికీ.. ప్రభుత్వ జూనియర్ కాలేజీల్లో చేరకుండా.. ప్రైవేటు, కార్పొరేట్ జూనియర్ కాలేజీల్లో చేరుతున్నారు విద్యార్థులు. గ్రామీణ ప్రాంతాల్లో ఉండే తల్లిదండ్రులు తమ పిల్లలను తమకు దగ్గరలో ఉండే ప్రభుత్వ జూనియర్ కాలేజీల్లో చేర్పించాలని భావిస్తున్నప్పటికీ.. వాటిలో విద్యార్థులకు సరిపడా కనీస సౌకర్యాలు లేక, బోధన చేయడానికి లెక్చరర్లు లేక, చివరికి అటెండర్లు, వాచ్మెన్లు, స్వీపర్లు లేక కాలేజీ ప్రిన్సిపాలే గంట కొట్టాల్సిన దయనీయ స్థితిలో ప్రభుత్వ కాలేజీలు కొనసాగుతున్నాయి. కాలేజీల్లో ప్రిన్సిపాలే చీపురుపట్టాలి లేకపోతే.. విద్యార్థులతో కాలేజీ ప్రాంగణాన్ని శుభ్రం చేయించుకోవాలి. కాలేజీలో ఉన్న మూత్రశాలలు, మరుగుదొడ్లను శుభ్రం చేయడానికి కూడా ఎవరు లేని పరిస్థితి నెలకొంది. ఆఫీసు సిబ్బందే కాదు.. కాలేజీలోని విద్యార్థులకు క్రమశిక్షణ నేర్పించాల్సిన ఫిజికల్ డైరక్టర్(వ్యాయామ ఉపాధ్యాయుడు)లు కూడా లేని దుస్థితి. రాష్ట్రంలో 424 ప్రభుత్వ జూనియర్ కాలేజీలుంటే వాటిల్లో 80 శాతానికిపైగా కనీస సౌకర్యాలు లేవు.