விஜயகாந்த், ரஜினி...யார் வழியில் விஜய்?

தென்னிந்திய திரையுலகின் முன்னணி நடிகரான விஜய்யின் அரசியல் வருகை குறித்துக் கடந்த சில ஆண்டுகளாகவே பேச்சு உள்ளது. அதற்கேற்ப அவர் படங்களிலும் அரசியல் வசனம் தவறாது இடம் பெறுகிறது. 'தலைவா' படத்தில் 'டைம் ரூ லீட்' என்ற வாசகம் இடம் பெற்றது. கத்தி, மெர்சல், சர்க்கார் என அடுத்தடுத்த படங்களிலும் அரசியல் வசனங்கள் இடம் பெற்றன. தொடர்ந்து, தனது படங்களின் ஆடியோ வெளியீட்டின் போது 'லேசுபாசாக’ அரசியல் பேசவும் தொடங்கினார்.

- பரிதிபாலன்

இந்நிலையில் தான் இந்த ஆண்டு 10-ஆம் வகுப்பு மற்றும் 12-ஆம் வகுப்பில் அதிக மதிப்பெண் பெற்ற மாணவர்களை சந்தித்து விருது வழங்கினார். அதற்காக தொகுதிவாரியாக மாணவர்களை வரவழைத்ததால், இது அரசியல் நுழைவுக்கு அச்சாரமோ என்ற ஐயப்பாடு பலருக்கு எழுந்தது.

வேடிக்கை என்னவென்றால், இதுவரை ரசிகர்கள்தான் 'தலைவா வா, தலைமையேற்க வா', 'கோட்டை காத்திருக்கு, கொடியேற்ற வா' என்றெல்லாம் கூவியழைத்தார்கள். இப்போது பரிசு வாங்கவந்த பள்ளி மாணவர்களே அரசியல் வர அழைப்பு விட, விஜய் சிறிது 'ஜெர்க்' ஆகினார் என்றே சொல்லவேண்டும்.