அரசியல், சினிமாவில்....இளவரசிகள்!

இளவரசி போல வாழ வேண்டும் என்று விரும்பாத பெண்களே கிடையாது. ஜெய்பூர் அரச குடும்பம், நவாப் குடும்பம் என நிஜ வாழ்க்கையில் இளவரசிகளாக இருந்தும், சமூக அக்கறையுடன் செயல்படும் ரியல் இளவரசிகளை பற்றி விவரிக்கிறது இந்த தொகுப்பு.

- தவா

19-ஆம் நூற்றாண்டின் தொடக்கத்தில் மேற்கு வங்கத்தின் கூச்பெகாரில் மகாராஜா ஜிதேந்திர நாராயணனுக்கும் மராட்டிய இளவரசி இந்திரா ராஜேவுக்கும் பிறந்தவர் இளவரசி காயத்ரி தேவி. உலகின் தலைசிறந்த 10 அழகிய பெண்களில் காயத்ரி தேவியும் ஒருவர் என்று 'வோக்' பத்திரிகை அந்நாளில் புகைப்படம் வெளியிட்டது.

லண்டனில் பள்ளிப் படிப்பை முடித்து சுவிட்சர்லாந்தில் உயர்கல்வி பயின்றவர், போலோ விளையாட்டிலும் குதிரை மீது அமர்ந்து செய்யும் சாகசங்களிலும் சிறந்து விளங்கினார். வேட்டையாடுவது, விலையுயர்ந்த வெளிநாட்டு கார்களை வாங்கி ஓட்டுவது என வீர விளையாட்டுகளிலும் ஈடுபட்டார்.

காயத்ரி தேவி, சவாய் மான் சிங் மகாராஜாவை திருமணம் செய்து கொண்டார். 1965-ல் காயத்ரி தேவியின் கணவரை ஸ்பெயின் தூதராக இந்திய அரசு நியமித்தது. அந்த காலகட்டத்தில் இளவரசி காயத்ரி தேவியின் பார்வை அரசியல் பக்கம் திரும்பியது.

ஜெய்ப்பூர் மக்களவைத் தொகுதியில் 1962, 1967, 1971ஆகிய தேர்தல்களில் சுதந்திரா கட்சி சார்பில் போட்டியிட்டு வெற்றி பெற்றார் காயத்ரி தேவி.

அன்றைய காலகட்டத்தில் காங்கிரஸில் சேருமாறு காயத்ரி தேவிக்கு பிரதமர் லால் பகதூர் சாஸ்திரி அழைப்பு விடுத்தார். ஆனால் எனக்குக் கொள்கைதான் முக்கியம் என்று கூறி அந்த அழைப்பை நிராகரித்தார் காயத்ரி தேவி.

எமர்ஜென்சி காலத்தில் பிரதமர் இந்திரா காந்தியையும், நெருக்கடி நிலையையும் எதிர்த்ததால், 5 மாதங்கள் திகார் சிறையில் அடைக்கப்பட்டார்.

இந்த சம்பவத்திற்கு பிறகு அரசியலை விட்டு விலகிய காயத்ரி தேவி, சமூக சேவையில் தன்னை முழுமையாக ஈடுபடுத்திக் கொண்டார்.

தனது 89-ஆவது வயதில் கூட ஜெய்ப்பூரில் ஆக்ரமிப்புகள் அதிகரித்து வருவதைக் கண்டித்து போராட்டத்தில் ஈடுபட்டார்.

அரசியலை விட்டு விலகி இருந்த நிலையிலும்... எம்.பி. தேர்தலில் போட்டியிட பல்வேறு கட்சிகள் சார்பில் மீண்டும் மீண்டும் வாய்ப்பு வந்தது. இருந்தும் அந்த வாய்ப்புகளை புறந்தள்ளி விட்டார்.

1976-ல் இவருடைய சுயசரிதை (A Princess Remember) வெளியிடப்பட்டது. ஃப்ராங்கோயிஸ் லெவி இயக்கிய Memoirs of a Hindu Princess என்கிற திரைப்படம் இளவரசி காயத்ரி தேவியின் வாழ்க்கையை மையமாகக் கொண்டு எடுக்கப்பட்டது.