வளைய வரும் போலிகள்!

உண்மைக்கு மதிப்பு குறையும்போது போலி உருவாகிறது. உண்மையை விட போலி அதிகம் விலை போகிறது. நவீன உலகில் போலி வேலைகள் எளிதாகிவிட்டதால், அதை பயன்படுத்தி காசு பார்க்க தொடங்கிவிட்டனர்.

- பரிதி

போலிகளில் முதலில் முன் நிற்பது போலி சமூக வலைத்தளங்கள். சில நாட்களுக்கு முன்பு பொதுப்பணி துறை பெயரில் சமூக வலைதளத்தில் போலி பக்கம் உருவாக்கப்பட்டு வசூல் வேட்டை நடந்தது வெளியானது.

அச்சு அசலாக அரசு முத்திரையுடன், அதிகாரிகள் பற்றிய விவரங்களுடன் பக்கம் உருவாக்கப்பட்டிருந்தது. அதில், பொறியாளர் உள்ளிட்ட அலுவலர் பணிகளுக்கு ஆட்கள் எடுப்பதாக விளம்பரம் செய்யப்பட்டிருந்தது.

அதுமட்டுமல்ல, அது தொடர்பாக, பலரும் ஆர்வமுடன் கேள்விகளை கேட்க, அதற்கென மொபைல் போன் எண் கொடுக்கப்பட்டு பொறுப்பாக பதிலும் சொல்லியிருக்கிறார்கள்.

பலரும் போன் செய்து கேட்ட பின்புதான் அதுபோன்று எந்த சமூக வலைதள பக்கமும் தொடங்கப்படவில்லை என உண்மையான பொதுப்பணித்துறை மூலம் விளக்கம் அளிக்கப்பட்டுள்ளது. அதற்குள் பலரும் பணத்தை கொடுத்து ஏமாந்துள்ளனர் என்பது தான் வருத்தத்துக்குரிய விடயம்.

கலெக்டர்கள், உயர்காவல் அதிகாரிகள் பெயரில் முகநூல் கணக்குகளை தொடங்கி பண உதவி கேட்ட பரிதாபங்களும் இதற்கு முன்பு நிகழ்ந்துள்ளனர்.

தூத்துக்குடி மாவட்ட ஆட்சியராக பணிபுரிந்த செந்தில்ராஜ் படத்தை வைத்து சமூக வலைதளங்களில் பணம் கேட்டு வாட்ஸ்அப் மூலம் வங்கிக் கணக்கிலும், ஆன்லைன் வாயிலாக கிஃப்ட் கார்டிலும் பணம் செலுத்துமாறு கோரிய செய்திகளும் இதற்கு முன்பு வந்தன.

பெண்கள் மற்றும் குழந்தைகளுக்கு எதிரான குற்ற தடுப்பு பிரிவு ஏ.டி.ஜி.பி.யாக இருந்த ரவி ஐ.பி.எஸ். போலி சமூக கணக்கு பற்றியும் இணைய குற்றங்கள் பற்றியும் தொடர்ந்து பேசி வந்தவர். அவர் பெயரிலேயே போலியான முகநூல் பக்கம் உருவாக்கப்பட்டு, 'கவர்ச்சிகரமான முதலீடு' என்ற பெயரில் ரூபாய் 40 ஆயிரத்திலிருந்து 4 லட்சம் வரை பணம் ஈட்டலாம் என்று வங்கி கணக்குடன் விளம்பரம் வெளியாகியிருந்தது.

முகநூல் பக்கத்தில் கொடுக்கப்பட்டிருந்த வங்கி கணக்கை ஆராய்ந்த போது ராஜஸ்தான் மாநிலத்தில் உள்ள வங்கி கணக்கு என்பதும், ராஜஸ்தான் மாநிலத்தை சேர்ந்த இணைய மோசடி கும்பலால் இந்த போலியான முகநூல் பக்கம் உருவாக்கப்பட்டது என்பதும் தெரியவந்தது.

அங்கே இங்கே சுற்றி அரசுத்துறை நிறுவனங்களின் கணக்கில் கைவைப்பது தான் பெரிய மோசடி. மத்திய இடைநிலை கல்வி வாரியமான சி.பி.எஸ்.இ. போலியான 30 சமூக வலைதள கணக்குகளை கண்டறிந்து சி.பி.எஸ்.இ. தொடர்பான தவறான தகவல்கள் பரவுவதை தடுக்க நடவடிக்கை எடுத்திருக்கிறது.