ഓണത്തിന്റെ ഉപ്പും മുളകും...

കേരളക്കരയെ ഒന്നാകെ ആകർഷിച്ച ഉപ്പും മുളകും പരമ്പരയിലെ കുടുംബാംഗങ്ങളുടെ ഓണവിശേഷങ്ങൾ...

- ഉമാ ആനന്ദ്

ആമുഖം ആവശ്യമില്ലാത്ത ടെലിവിഷൻ പരമ്പരയാണ് ഉപ്പും മുളകും. 2015 -ൽ തുടങ്ങിയ പരമ്പര അതിന്റെ ജൈത്രയാത്ര തുടരുകയാണ്. ഇത്രമേൽ ജനകീയമായ മറ്റൊരു പരമ്പര ഇല്ലെന്ന് തന്നെ പറയാം. അതിലെ ഓരോ കഥാപാത്രങ്ങളും അഭിനയിക്കുന്നത് അനായാസമായിട്ടാണ്. അഭിനയമാണെന്ന് തോന്നുകയേ ഇല്ല എന്നതാണ് സത്യം. അതുതന്നെയാണ് അതിന്റെ വിജയ രഹസ്യവും. സർവകാല റിക്കോഡിലേക്ക് നീങ്ങുന്ന ഈ പരമ്പരയിലെ അഭിനേതാക്കൾ ഇതാദ്യമായി ഓണത്തെക്കുറിച്ചുള്ള ഓർമകൾ ഒരുമിച്ച് പങ്കുവയ്ക്കുന്നു.

പട്ടിണിയായ ഒരു ഓണം

ബാലു (ബിജു സോപാനം)

ഓണ അനുഭവങ്ങൾ ധാരാളമുണ്ടങ്കിലും മനസ്സിൽ പറ്റിച്ചേർന്ന് കിടക്കുന്നത് കുട്ടിക്കാലത്തെ ചൂടേറിയ ഒരു ഓണ ഓർമയാണ്. ഞാൻ അപ്പൂപ്പന്റേയും അമ്മൂമ്മയുടേയും കൂടെയാണ് കുട്ടിക്കാലത്ത് പഠിച്ചതും വളർന്നതും. അതായത് അമ്മൂമ്മയുടെ വീട്ടിൽ. അമ്മൂമ്മയെന്ന് വച്ചാൽ എനിക്ക് ജീവനാണ്. കൂട്ടത്തിൽ ഒരു കുശുമ്പും കൂടിയുണ്ട് - അമ്മൂമ്മ എന്നെ മാത്രമേ സഹിക്കാവൂ അമ്മൂമ്മയ്ക്ക് എട്ട് മക്കളുണ്ട്. മക്കളും പേരമക്കളും മറ്റ് ബന്ധുക്കളുമൊക്കെ അമ്മൂമ്മയെ കാണാൻ വരുന്നത് നാലാം ഓണത്തിനാണ്. അന്ന് വീട് മുഴുവൻ ആളുകളായിരിക്കും. ഞാൻ ഏഴാം ക്ലാസിലാണെന്നാണ് ഓർമ. ആ വർഷത്തെ ഓണവും അമ്മൂമ്മയുടെ വീട്ടിൽ അടിച്ചു പൊളിച്ചു. അമ്മൂമ്മ നാലാം ഓണത്തിന് കാത്തിരിക്കുകയാണ്. ഞാനും.

ഓരോരുത്തരായി വന്നു തുടങ്ങി. മക്കളും പേരമക്കളും മറ്റു ബന്ധുക്കളും.

കുറേ നേരമായിട്ടും അമ്മൂമ്മ എന്നെ ഗൗനിക്കുന്നില്ല. മിണ്ടുന്നില്ല. നോക്കുന്നു പോലുമില്ല! എനിക്ക് സഹിക്കാൻ കഴിഞ്ഞില്ല.

ഞാൻ അവിടെ നിന്നും പോയി വെയിലുള്ള സ്ഥലത്ത് ചെന്ന് കിടന്നു. വിളികാത്തുകാത്ത് ആ വെയിലത്ത് തന്നെ ഉറങ്ങിപ്പോയി! ഉറക്കമെണീറ്റ് നോക്കുമ്പോൾ മണി നാല് ആരും എന്നെ അന്വേഷിച്ചു വന്നില്ല, ഉണ്ണാനും വിളിച്ചില്ല.