അക്ഷരലോകത്തെ സൗമ്യമുഖം

പാദമുദ്ര

- സജിൽ ശ്രീധർ

യു.കെ.കുമാരൻ എന്ന വാക്ക് കേൾക്കുമ്പോൾ മനസിൽ ആദ്യം ഓടിയെത്തുന്നത് ഒരേ സമയം പാരായണക്ഷമതയും ഉൾക്കാമ്പുമുളള കഥകളിലൂടെ, നോവലറ്റുകളിലൂടെ മനസിനെ കീഴടക്കിയ ഒരു എഴുത്തുകാരന്റെ മനസാണ്. അദ്ദേഹത്തെ ഇന്നേവരെ നേരിൽ കണ്ടിട്ടില്ല. സംസാരിച്ചിട്ടില്ല. ഫോട്ടോകളിലൂടെ ആ രൂപം പരിചിതമാവും മുൻപേ ആ മനസ് തൊട്ടറിഞ്ഞിരുന്നു ഒരുകാലത്ത് ഞങ്ങളുടെ തലമുറയിലെ വായനക്കാർ.

ഇന്നും ചിത്രങ്ങളിൽ യു.കെ. ചെറുപ്പമാണ്. കഷ്ടിച്ച് 50-ൽ അധികം പ്രായം പറയില്ല. എന്നാൽ സമീപകാലത്ത് അദ്ദേഹം സപ്തതി പിന്നിട്ടു. 72 വയസ് പിന്നിട്ട ഒരാളെന്ന് ആരും പറയില്ല. പല ചില്ലറ  എഴുത്തുകാരുടെയും സപ്തതി ഗംഭീരമായി കൊണ്ടാടിയപ്പോൾ യു.കെ.യുടെ എഴുപതാം പിറന്നാൾ ആരും ആഘോഷിച്ച് കണ്ടില്ല. അത്തരം ആഘോഷങ്ങൾക്കും ആരവങ്ങൾക്കും നിന്നു കൊടുക്കുന്ന ആളല്ല യു.കെ.

സൗമ്യവും നിശ്ശബ്ദവുമായി എഴുത്ത് എന്ന കർമ്മം അനുഷ്ഠിക്കാനാണ് എക്കാലവും അദ്ദേഹം ശ്രമിച്ചു പോന്നിട്ടുള്ളത്. ദീർഘകാലം പത്രപ്രവർത്തകനായി പ്രവർത്തിക്കുമ്പോഴും വല്ലപ്പോഴും മാത്രം എഴുതുന്ന ഒരാളായിരുന്നു യു.കെ.

ആന്തരിക പ്രേരണ ശക്തമാകുമ്പോൾ മാത്രം പേന എടുക്കുന്ന ഒരാൾ.