നൃത്തത്തിൽ ചുവട് വച്ച ജീവിതം

വഴിത്തിരിവ് നാട്യാലയ രവികുമാർ - പ്രശസ്തർ തങ്ങളുടെ ജീവിതത്തിൽ വഴിത്തിരി വായ സന്ദർഭങ്ങൾ ഇവിടെ പങ്ക് വയ്ക്കുന്നു.

- ഉമ ആനന്ദ്

നൃത്ത കുടുംബത്തിൽ ജനനം. പിന്നീട് ഗുരുവായ ചേച്ചിയുടെ മടിയിലിരുന്ന് നൃത്തം കണ്ടും കേട്ടും വളർന്ന ബാല്യം.

നൃത്ത രംഗത്തെ അതികായന്മാരായ രാജരത്തിനും പിള്ള, ഡോ. സി.പി. ഉണ്ണിക്കൃഷ്ണൻ എന്നിവരിൽ നിന്നുള്ള ശിക്ഷണം. നൃത്തത്തിന് വേണ്ടി ഔദ്യോഗിക സ്ഥാനക്കയറ്റം പോലും വേണ്ടെന്ന് വച്ച ആത്മാർത്ഥത. ട്രാൻസ്ഫറായി പോകുന്ന സ്ഥലങ്ങളിലൊക്കെ നൃത്തം പഠിപ്പിക്കാനുള്ള ആവേശം. ഇന്ത്യയ്ക്കകത്തും പുറത്തുമായി പതിനായിരം കടന്ന ശിഷ്യസമ്പത്ത്. സ്വന്തം മകൾ നൃത്താദ്ധ്യാപികയായത് കാണാനുള്ള ധന്യത.

നൃത്തത്തെ പ്രാണവായുവാക്കിയ നാട്യാലയ രവികുമാർ പിന്നിട്ട വഴികൾ ഓർത്തെടുക്കുന്നു...

“ഞാൻ ജനിച്ചത് പെരുമ്പാവൂരിൽ. അച്ഛൻ കൃഷ്ണൻ നായർ. അമ്മ ഭാരതി അമ്മ. ആറു മക്കളിൽ ഏറ്റവും ഇളയവൻ. സ്കൂൾ പഠനം തുടങ്ങി ഒന്നാം ക്ലാസ് കഴിഞ്ഞപ്പോൾത്തന്നെ പെരുമ്പാവൂരിൽ നിന്നും അമ്മയുടെ നാടായ തൃക്കാരിയൂരിലെ പിണ്ടിമനയിലേക്ക് താമസം മാറി. പിന്നെ അവിടെയായിരുന്നു സ്കൂൾ കാലം. ഞാനും സഹോദരങ്ങളും തമ്മിൽ നല്ല പ്രായവ്യത്യാസമുണ്ട്. എന്റെ ര ണ്ടാമത്തെ സഹോദരിയാണ് കലാമണ്ഡലം സുമതി ടീച്ചർ  ചേച്ചി കലാമണ്ഡലത്തിൽ നിന്ന് പഠനം പൂർത്തിയാക്കി വരുമ്പോൾ ഞാൻ ജനിച്ചിട്ടേ ഉള്ളൂ. ചേച്ചിക്ക് വേണ്ടി അച്ഛൻ “ഭാരതീ നൃത്തകലാലയം' എന്ന പേരിൽ ഒരു സ്ഥാപനം തുടങ്ങി. ചേച്ചി എന്നെ എടുത്തുകൊണ്ടായിരുന്ന നൃത്തവിദ്യാലയത്തിൽ പോയിരുന്നത്. നൃത്തവും ജതികളും എന്റെ ശ്വാസത്തിനൊപ്പം ഉണ്ടായിരുന്നു. ഞാൻ പിച്ചവച്ചു നടന്നതുതന്നെ നൃത്തത്തിനിടയിലാണ്. അച്ഛന് സിംഗപ്പൂരിലായിരുന്നു ജോലി. അവിടെയായിരുന്നെങ്കിലും കലാപരമായി ഭ്രമമുള്ള ആളായിരുന്നു.