കാർഷിക ശ്രമശക്തിയുടെ പര്യായം പോലെ

മുപ്പത് സെന്റിൽ നിന്ന് അൻപത് ഏക്കറിലേക്ക്...

- പ്രദീപ് ഉഷസ്സ്

നോക്കെത്താദൂരത്തോളം പരന്നുകിടക്കുന്ന വിശാലമായ പാടശേഖരം... വയലിനാകെ സ്വർണ്ണ വർണ്ണമാക്കുന്ന വിളഞ്ഞു പാകമായ നെൽക്കതിരുകൾ... ഇളങ്കാറ്റിലിളകിയാടുന്ന നെൽച്ചെടികൾക്കിട യിലൂടെ, നടന്നുവരികയാണൊരാൾ...

സാരിക്ക് മുകളിൽ കരിംപച്ച ഓവർകോട്ടണിഞ്ഞ്, കൂടെയൊരു തോർത്തുകൊണ്ട് പുതച്ച്, നെൽക്കതിരുകളെ തലോടി കടന്നുവരുന്ന ഈ വീട്ടമ്മയെ തേടിയാ ണ് സംസ്ഥാന സർക്കാരിന്റെ ഈ വർഷത്തെ ഏറ്റവും മികച്ച കർഷകയ്ക്കുള്ള “കർഷകതിലകം' പുരസ്ക്കാരമെത്തിയത്. പരമ്പരാഗത കാർഷിക അറിവുകൾക്കൊപ്പം, യന്ത്രവൽകൃത സാധ്യതകളും ശാസ്ത്രീയമായി ഉപയോഗിക്കാൻ കഴിഞ്ഞതുകൊണ്ടാണ് കണ്ണൂർ പട്ടുവത്തെ കാക്കാമണി വീട്ടിലെ ബിന്ദുവിന് ഈ അപൂർവ്വ നേട്ടം കൈവരിക്കാൻ കഴിഞ്ഞത്. ഇതിന് മുമ്പ് സംസ്ഥാന സർക്കാരിന്റെ ശ്രമശക്തി അവാർഡ് നേടാനും ഈ വീട്ടമ്മയ്ക്ക് കഴിഞ്ഞിട്ടുണ്ട്.

പൊതുവെ സ്ത്രീകൾ കടന്നുവരാൻ മടിക്കുന്ന യന്ത്രവൽകൃത കൃഷിരീതിയിൽ, കഴിവ് തെളിയിക്കാൻ കഴിഞ്ഞതാണ് ബിന്ദുവിനെ മറ്റുള്ളവരിൽ നിന്ന് വേറിട്ട് നിർത്തുന്നത്. ഇന്ന് ട്രാക്ടറും, കൊയ്ത്തുമെതിയന്തങ്ങളുമെല്ലാം, സ്വന്തമായി ഓടിച്ചുകൊണ്ട് ബിന്ദു കാർഷിക വിസ്മയങ്ങൾ തീർക്കുന്നു. പൊതുലോകത്തെക്കുറിച്ച് വലിയ ധാരണയൊന്നുമില്ലാതിരുന്ന ഈ വീട്ടമ്മയിൽ നിന്ന് സംസ്ഥാനത്തെ ഏറ്റവും മികച്ച കർഷകയിലേക്കുള്ള ഈ വളർച്ചയ്ക്ക് പിന്നിൽ ഏറെക്കാലത്തെ കഠിനാദ്ധ്വാനത്തിന്റെ അഭിമാനകരമായ ചിത്രമാണുള്ളത്.

സ്വന്തമായി മുപ്പത് സെന്റ് ഭൂമി മാത്രമുള്ള ബിന്ദുവും ഭർത്താവ് മനോഹരനും ചേർന്ന്, ഇന്ന് അൻപത് ഏക്കറിലധികം ഭൂമി പാട്ടത്തിന് എടുത്ത് കൊണ്ടാണ് വിജയകരമായി കൃഷി ചെയ്തുകൊണ്ടിരുന്നത്. അവരുടെ അധ്വാനമഹത്വത്തിന്റെ നേർക്കാഴ്ച തന്നെയാണിത്.

മണ്ണറിഞ്ഞ് വളർന്ന ബാല്യം

വയൽ ഒരുക്കുന്നതും വിത്തുവിതയ്ക്കുന്നതുമൊക്കെ കണ്ടുവളർന്ന ബാല്യമായിരുന്നു ബിന്ദുവിന്റേത്. അച്ഛൻ കാക്കാമണി ഗോവിന്ദൻ അറിയപ്പെടുന്ന കർഷകനായിരുന്നു. അതു കൊണ്ടുതന്നെ കൃഷിപ്പണികൾ എല്ലാം തൊട്ടടുത്ത് നിന്നുതന്നെ കണ്ടും കേട്ടുമറിയാൻ ചെറുപ്രായത്തിൽ തന്നെ ബിന്ദുവിന് കഴിഞ്ഞിരുന്നു. വയലിലും കരയിലുമെല്ലാം ഏത് വിധത്തിൽ കൃഷി ചെയ്യണമെന്നല്ലാം മനസ്സിലുറച്ചത് അങ്ങനെയാണ്. വിവാഹ ശേഷം ഭർത്താവ് മനോഹരനും എല്ലാവിധത്തിലും ഒപ്പം നിന്നതോടെയാണ് തന്റെ കാർഷിക സ്വപ്നങ്ങളുമായി മുന്നോട്ടുപോകാൻ ബിന്ദുവിന് കഴിഞ്ഞത്.