നൃത്തം എന്നും മോഹം

'അന്നു സിനിമയിൽ നിന്നു മാറി നിൽക്കേണ്ടിയിരുന്നില്ല' ശാന്തി കൃഷ്ണ പറയുന്നു

- വിജീഷ് ഗോപിനാഥ് 

രണ്ടു കാലഘട്ടത്തിലെ സിനിമയിൽ അഭിനയിച്ചിട്ടുണ്ടല്ലോ. സിനിമയിൽ വന്ന മാറ്റങ്ങൾ എന്തൊക്കെയാണ് ? കഥാപാത്രങ്ങൾ തമ്മിലുള്ള വ്യത്യാസങ്ങൾ എന്തൊക്കെയാണ് ? ജിഷ ആൻ എബ്രഹാം, അസി. പ്രഫസർ, സെയ്സ്ഗിറ്റ്സ് എഞ്ചിനിയറിങ് കോളജ്, കോട്ടയം

 രണ്ടു കാലത്തെയും സിനിമകൾ തമ്മിൽ വലിയ വ്യത്യാസം ഉണ്ട്. സാങ്കേതിക കാര്യങ്ങളിൽ അടുമുടി മാറി. തേടിവരുന്ന കഥാപാത്രങ്ങളിലും ആ മാറ്റം കാണാം. നായികയും നായകനും ഇങ്ങനെയായിരിക്കണം എന്ന ചട്ടക്കൂടെല്ലാം പുതിയകാല സിനിമകൾ പൊളിച്ചു കളഞ്ഞിട്ടുണ്ട്. മുൻനിര താരങ്ങൾ വേണം എന്ന നിർബന്ധം ഇന്നില്ലല്ലോ.

അഭിനയ രീതിയിൽ മാറ്റം ഒന്നും ഇല്ല. ഞാനും അംബികയും ജലജയും ഉൾപ്പെടെയുള്ളവർ അന്നും സ്വാഭാവികമായ രീതിയിലാണ് അഭിനയയിച്ചത്. ഇന്നും അങ്ങനെ തന്നെയാണ്.

സിനിമയിൽ ന്യൂജെൻ നായകന്മാരുടെ സുന്ദരിയായ അമ്മയാണല്ലോ... പിന്തുടരുന്ന ഡയറ്റ് എന്താണ്? അനിഖിൽ, ബെംഗളൂരു

 കോംപ്ലിമെന്റിനു നന്ദി. എന്റെ ഏറ്റവും നല്ല വ്യായാമം നൃത്തമായിരുന്നു. മറ്റു വലിയ വ്യായാമങ്ങൾ ഒന്നുമില്ല. നടത്തവും ചെറിയ സ്‌ട്രെച്ചിങും ഒക്കെ ചെയ്യാറുണ്ട്.