വേനൽ കടമ്പ കടക്കാം

കടുത്ത വേനലിൽ ശരീരം തണുപ്പിക്കാനും അസുഖങ്ങളെ പ്രതിരോധിക്കാനും വിട്ടിൽ കുളിർമ നിറയ്ക്കാനും ഒക്കെയുള്ള വഴികളിതാ..

- ശ്യാമ

ഒന്നു പുറത്തേക്കിറങ്ങിയാൽ തളർന്നു പോകുന്നത്ര ചൂട്. ശരീരത്തിൽ നിന്നു മുഴുവൻ ജലാംശവും സൂര്യൻ ഒരു നോട്ടം കൊണ്ട് വലിച്ചൂറ്റിയെടുക്കുന്ന പോലെ. വേനൽ കനക്കുകയാണ്. നമുക്ക് വിവേകപൂർവം വേനലിനെ നേരിടാനുള്ള കുറച്ചു വഴികൾ നോക്കാം.

ശ്വാസകോശ സംബന്ധമായ മുൻകരുതലുകളും എടുക്കേണ്ട പ്രതിരോധ മാർഗങ്ങളെ കുറിച്ചും പൊതു ആരോഗ്യത്തെ കുറിച്ചുമാണ് ആദ്യ ഭാഗം. വലിയ പണം മുടക്കില്ലാതെ വീടിന്റെ അകത്തളങ്ങൾ തണുപ്പിക്കാനുള്ള വഴികൾ പറഞ്ഞു തരുന്നതാണ് അടുത്ത വിഭാഗം. മൂന്നാമതായി വേനൽക്കാല ഡയറ്റും കടുത്ത ചൂടിൽ ഒഴിവാക്കേണ്ട ആഹാര രീതികളുമാണ്. നാലാമത്തേത് വേനൽക്കാലത്തു കുട്ടികളുടെ ആരോഗ്യത്തെക്കുറിച്ച് അവബോധം തരുന്നത്.

ആയുർവേദ വഴികളിലൂടെ എങ്ങനെ ശരീരം തണുപ്പിക്കാം എന്നുള്ള അഞ്ചാം വിഭാഗം. ആറാമതായി ഏതൊക്കെ തരം തുണിത്തരങ്ങളാണു ചൂടുകാലത്ത് ഏറ്റവും ഉതകുന്നതെന്നു പറഞ്ഞു തരുന്നതും. അന്തരീക്ഷത്തിലെ ചൂടു നിയന്ത്രിക്കുന്നതു നമ്മുടെ കൈ പിടിയിൽ ഒതുങ്ങാത്തതാണെങ്കിലും ശരീര താപം കുറയ്ക്കാനുള്ള വഴികൾ അറിഞ്ഞു വയ്ക്കാം.

വേനലും ആരോഗ്യവും

കാലാവസ്ഥാ മുന്നറിയിപ്പുകൾ കൃത്യമായി ശ്രദ്ധിക്കുക. പലതരം ആപ്പുകൾ വഴിയും പൊലൂഷൻ കൺട്രോൾ ബോർഡിന്റെ വെബ്സൈറ്റ് നോക്കിയാലും മനസ്സിലാകും. ശ്വാസകോശ പ്രശ്നമുള്ളവർ ഇവ നോക്കി മലിനീകരണതോത് കൂടിയ സ്ഥലങ്ങളിലൂടെ യാത്ര ചെയ്യേണ്ടി വന്നാൽ മുൻകരുതലുകളെടുക്കുക.

വേനൽക്കാലത്ത് ജലനഷ്ടം കൂടുതലായിരിക്കും. ദാഹിക്കുന്നില്ലെങ്കിലും വെള്ളം കുടിക്കുന്നതു ശീലിക്കുക. ഹൃദയ- വൃക്ക രോഗങ്ങളുള്ളവർ ഡോക്ടർ നിർദേശിക്കുന്ന അളവിൽ മാത്രം വെള്ളം കുടിക്കുക.

വേനൽക്കാലത്തു മദ്യം മാത്രമല്ല, ചായയും കാപ്പിയും പോലും കഴിവതും ഒഴിവാക്കണം. കഫീൻ അടങ്ങിയ പാനീയങ്ങൾ കുടിക്കാതിരിക്കുക. കാപ്പി, കാപ്പിയടങ്ങിയ ചോക്ലെറ്റ്, ഐസ്ക്രീമുകൾ ഇവയൊക്കെ ഒഴിവാക്കാം.

കിടപ്പുമുറി എന്നും വൃത്തിയാക്കാം. പൊടി ഒട്ടുമില്ലെന്ന് ഉറപ്പു വരുത്താം. മുറി വൃത്തിയാക്കുമ്പോൾ കഴിവതും മാസ്ക് വച്ചിട്ടു വേണം വൃത്തിയാക്കാൻ.

അടുക്കള വായുസഞ്ചാരമുള്ളതാണെന്നു ഉറപ്പാക്കുക. വായുസഞ്ചാരം കുറഞ്ഞ അടുക്കളയിലെ പാചകം പലരിലും ശ്വാസകോശ പ്രശ്നങ്ങൾക്കു കാരണമാകുന്നുണ്ട്.

ഉച്ച സമയത്തുള്ള അത്യാവശ്യമില്ലാത്ത യാത്രകൾ പരമാവധി ഒഴിവാക്കുക. പകലും വൈകുന്നേരവും രാത്രിയും യാത്ര ചെയ്യുക.