വാഴപ്പഴത്തിൽ കുരുവില്ലാതായതിനു പിന്നിൽ

എങ്ങനെയെങ്ങനെ ഇങ്ങനെയായി

- ടി വി നാരായണൻ

പഴം എന്ന് കേൾക്കുമ്പോൾ തന്നെ കൂട്ടുകാരുടെ മനസ്സിലേക്ക് ആദ്യം വരുന്ന പഴം ഏതായിരിക്കും? മിക്കവാറും അത് വാഴപ്പഴം ആയിരിക്കും, അല്ലേ? കുരുവില്ലാത്ത, മാംസളമായ, മധുരമുള്ള രസികൻ പഴം. അതാണല്ലോ നമ്മുടെ വാഴപ്പഴം. നാടൻ വാഴപ്പഴം ആണെങ്കിലോ രുചി അൽപ്പം കൂടെ കൂടും. അല്ലേ...

വാഴയ്ക്കു പിന്നിൽ മറഞ്ഞിരിക്കുന്ന ചില കാര്യങ്ങൾ കേട്ടോളൂ. ആളത്ര നിസ്സാരക്കാരനൊന്നുമല്ല, പണ്ട് ഇത്തിരി റഫ് ആൻഡ് ടഫ് ആയിരുന്നു താനും. പണ്ടെന്ന് പറഞ്ഞാൽ ഒരു ഏഴായിരം വർഷങ്ങൾ മുമ്പത്തെ കാര്യമാണ്. അന്ന് നിറയെ കട്ടി കൂടിയ വിത്തുകൾ നിറഞ്ഞ്, മാംസള ഭാഗം വളരെ കുറഞ്ഞ, ചവർപ്പുള്ളവയായിരുന്നു ടിയാൾ. അതായത്, തിന്നാൻ പ്രയാസമുള്ള പഴങ്ങളായിരുന്നു അവ. കാടുകളിൽ ഇപ്പോഴും ആ ടൈപ്പ് വാഴകൾ ഏറെയുണ്ട്. പിന്നെങ്ങനെ ഇത്രയും രുചിയും മൃദുത്വവും ഒക്കെ വന്നു എന്നല്ലേ? അവിടെയാണ് സംഗതി അങ്ങനെ നീണ്ടു നിവർന്നു കിടക്കുന്നത്. കേട്ടോളൂ:

ഉയരത്തിൽ വളരുന്നതും വലിപ്പമുള്ള ഇലകളുള്ളതുമായ വാഴ, സസ്യലോകത്തെ ഏറ്റവും വലിയ ഓഷധിയാണ്. വളരെ ദുർബലവും നേർത്തതും ആയ കാണ്ഡത്തോടു കൂടിയ സസ്യ ങ്ങളാണ് ഓഷധികൾ എന്നറിയാമല്ലോ. മറ്റു വലിയ ഓഷധികൾ ഏതൊക്കെയാണ്?