ઓસ્કર ૨૦૨૩: ચાર ભારતીય કૃતિઓની પસંદગી

ઑસ્કરનું નોમિનેશન લિસ્ટ ૨૪મી જાન્યુઆરીએ જાહેર થશે. તેના માટે ભારતમાંથી ગુજરાતી ફિલ્મ ‘છેલ્લો શૉ’, RRRનું ‘નાટુ નાટુ’ ગીત અને ‘ઑલ ધેટ બ્રિથ્સ' તથા ‘ધ ઍલિફેન્ટ્સ વ્હિસ્પર્સ' નામની બે દસ્તાવેજી ફિલ્મ ઍકેડમી દ્વારા પસંદ પામી છે. આજે આ બે દસ્તાવેજી ફિલ્મો વિશે રસપ્રદ વાત તથા ઑસ્કરમાં કઈ રીતે, કઈ કૅટેગરી અંતર્ગત આ ફિલ્મો પસંદ કરાઈ છે તેની છણાવટ કરી છે.

- પાર્થ દવે

ઓસ્કર એવોર્ડ્સ પાછળની બોડી, ધ એકેડમી ઓફ મોશન પિક્ચર આર્ટ્સ એન્ડ સાયન્સે ૧૦ કેટેગરીમાં વર્ગીકૃત કરાયેલી ફિલ્મોની સત્તાવાર જાહેરાત કરી છે. આ કેટેગરી આ મુજબ છેઃ દસ્તાવેજી ફિચર ફિલ્મ, દસ્તાવેજી શોર્ટ ફિલ્મ, ઇન્ટરનેશનલ ફિચર ફિલ્મ, મેકઅપ એન્ડ હેરસ્ટાઇલિંગ, મ્યુઝિક (ઓરિજિનલ સ્કોર), મ્યુઝિક (ઓરિજિનલ સોન્ગ), એનિમેટેડ શોર્ટ ફિલ્મ, લાઇવ એક્શન શોર્ટ ફિલ્મ, સાઉન્ડ એન્ડ વિઝ્યુઅલ ઇફેક્ટ્સ.

આ દરેક કેટેગરીમાં ૧૦થી ૧૫ કૃતિઓની અંતિમ યાદી તૈયાર કરાઈ છે. એમાંથી જેને ૯૫મા ઓસ્કર માટે નોમિનેટ કરાશે તેની જાહેરાત ૨૪મી જાન્યુઆરીએ થશે. એવોર્ડ સમારોહ ૧૨ માર્ચે લોસ એન્જલસમાં યોજાશે.

નાટુ નાટુ: ૮૦ વેરિએશન્સ, ૧૮ ટેક!

અંતિમ યાદીમાં જુદા જુદા પ્રકારની ચાર ભારતીય ફિલ્મ કૃતિ પસંદગી પામી છે. પહેલા તો એસ.એસ. રાજામૌલીની લોકપ્રિય ફિલ્મ આરઆરઆરના ગીત ‘ નાટુ નાટુ’ની વાત કરીએ.

હિન્દીમાં જેનું રૂપાંતર ‘ નાચો નાચો’ કરવામાં આવ્યું છે તે તેલુગુ ગીત ‘નાટુ નાટુ’ મૌલિક ગીતની શ્રેણીમાં ટોચનાં ૧૫ ગીતોમાં પસંદગી પામ્યું છે. અવતાર, બ્લેક પેન્થર, વ્હેર ધ ક્રોવડેડ્સ વગેરે જેવી ૧૪ ફિલ્મોનાં અન્ય ગીતો પણ સ્પર્ધામાં સામેલ છે. અગાઉ ૨૦૦૮માં સ્લમડોગ મિલિયોનેરનું હિન્દી ગીત ‘જય હો’ શ્રેષ્ઠ મૌલિક ગીત અને સંગીતનો એવોર્ડ જીત્યું હતું. એ.આર. રહેમાન અને ગુલઝારે ભારતને ગૌરવની ક્ષણો આપી હતી. જોકે, તે ડેની બોયલ દિગ્દર્શિત બ્રિટિશ ફિલ્મ હતી.

‘નાટુ નાટુ' એમ.એમ. કિરવાનીએ સંગીતબદ્ધ કર્યું છે. કાલા ભૈરવા તથા રાહુલ સિપ્લિગુંજે ગાયું છે અને ચંદ્રાબોઝે લખ્યું છે. અગાઉ તે ઓસ્કર પછીના સૌથી પ્રતિષ્ઠિત ફિલ્મ એવોર્ડ્સ ગોલ્ડન ગ્લોબ અને ક્રિટિક્સ ચોઇસ એવોર્ડ માટે નોમિનેટ થઈ ચૂક્યું છે.