એનઆરઆઈ વેડિંગ સ્પેશિયલ

લગ્નપ્રસંગને પુષ્પોથી સજાવવા આંતરરાષ્ટ્રીય માળીઓ ઉપલબ્ધ છે

- સિદ્ધાર્થ આદિત્ય

શ્રીમંતોનાં લગ્નોમાં જ્વેલરી, કપડાં, ભોજન અને ડેકોરેશન અદ્યતન જ હોય. ડેકોરેટર્સ આજે લગ્ન સ્થળે અલકાપુરી ખડી કરી દે છે. શ્રીમંતોને ત્યાં તાજા ફૂલોનું ડેકોરેશન ક૨વા સામાન્ય માળીઓ હોતા નથી, પણ માળીઓની ઇન્ટરનેશનલ કંપનીઓ છે, જે ફ્લોરિસ્ટ તરીકે ઓળખાય છે. માત્ર લગ્નોમાં જ નહીં, પણ અનેક સુખના (શ્રદ્ધાંજલિ સભા જેવા દુઃખદ પ્રસંગમાં પણ) પ્રસંગોમાં ફૂલોની એ પ્રકારે સજાવટ કરી આપે છે કે જોનાર વ્યક્તિ દંગ રહી જાય. ફૂલોનો શણગાર માત્ર મંડપ પૂરતો સીમિત હોતો નથી, પરંતુ લગ્નના વિશાળ વેન્યુને કેલિડોસ્કોપની ડિઝાઇનોની માફક ફૂલોની ડિઝાઇનોથી શણગારાય છે. સાથે રંગબેરંગી રોશની ભળે. તે પ્રસંગમાં સામેલ થનાર રોજબરોજની માનસિક તણાવની દુનિયા ભૂલીને કોઈક નવી જ દુનિયામાં આવીને પ્રફુલ્લિત બનવાનો અનુભવ કરે છે.

ઇન્ટરનેશનલ માળીઓની અથવા ફ્લોરિસ્ટની આવી મહત્ત્વની કંપનીઓમાં એક નામ પ્રેસ્ટોન બેઇલીનું છે. દુનિયાના નામી શ્રીમંતો તેઓના ગ્રાહકો છે. ન્યૂ યૉર્ક ખાતે વડું મથક ધરાવતી આ અગ્રણી ફ્લોરલ ડિઝાઇનર કંપની ગ્રાહકો વતી ફૂલોના સુશોભનના પ્લાન ઘડી આપે છે. દુનિયામાં કોઈ પણ સ્થળે ઊગતાં ફૂલોને એ પ્લાનમાં ગોઠવવામાં આવ્યાં હોય તો કંપની વિમાન માર્ગે તે ફૂલોની બજારથી વપરાશકાર સુધી પહોંચાડી દે છે. જોકે તેમ છતાં લાંબું અંતર હોય તો અમુક વધુ સંભાળ લેવી પડે. ફૂલો જોઈએ એટલા તાજા ન રહે તો તે માટેની અન્ય વૈકલ્પિક છતાં સુંદર લાગે તેવી ડિઝાઇન ઘડી કઢાય છે, જેમાં ફૂલો પ્રમાણમાં નજીકના અંતરેથી મળી રહે.

પ્રેસ્ટોન બેઇલીએ હમણાં મુકેશ અંબાણીના પુત્રનાં લગ્નમાં ફૂલોની ડિઝાઇનનું કામકાજ સંભાળ્યું હતું. કંપનીના કાયમી ગ્રાહકોમાં ટેનિસ ખેલાડી સેરેના વિલિયમ્સ, ટૉક શૉ માટે પ્રસિદ્ધ ઓપરા વિનફ્રે, અમેરિકાનો પ્રસિદ્ધ બાસ્કેટબૉલ ખેલાડી લિબ્રોન જેમ્સ, અંબાણી જેવા દુનિયાના અનેક શ્રીમંત પરિવારો છે. આ કંપની ઑર્ડર પ્રમાણે દૂર વસતી કોઈ નજીકની વ્યક્તિને જન્મદિવસની શુભેચ્છા અને અન્ય શુભેચ્છાઓ માટે તાજા ફૂલોનો બનેલો પુષ્પગુચ્છ અથવા બુકે પણ પહોંચાડે છે. ભારતમાં આ પ્રથા મોટાં શહેરોમાં હળવી માત્રામાં છે, પરંતુ યુરોપ અમેરિકામાં ભારી માત્રામાં છે.