વારાણસી-કોલકાતા કોરિડોર

૩૦૦૦૦ કરોડના ખર્ચે બાંધવામાં આવનાર, એક્સપ્રેસ-વેની મોટી આર્થિક અસરો છે, કારણ કે તે પૂર્વ ભારતનાં મુખ્ય ખનિજનો મહત્ત્વપૂર્ણ ઔદ્યોગિક માર્ગ બનશે. જેને વડાપ્રધાન ગતિશક્તિ સાથેના તાલમેલના ભાગરૂપે મુખ્ય ઔદ્યોગિક નોડ સાથે જોડવામાં આવશે

- મુકેશ ઠક્કર

દેશની બે સાંસ્કૃતિક રાજધાની વારાણસી

અને કોલકાતાને નજીક લાવશે!

વારાણસી - કોલકાતા કોરિડોરનું કામ હવે વેગવંત આગળ વધશે! આ કોરિડોરના ફળસ્વરૂપે કાશી વિશ્વનાથ મંદિર અને કાલીઘાટનાં કાલી માતા વચ્ચે યાત્રા સાતથી આઠ કલાકમાં થઈ જશે! ચાર રાજ્યોમાંથી એક્સપ્રેસ ધોરી માર્ગ પસાર થઈ દેશનાં બે સાંસ્કૃતિક પાટનગરો વારાણસી અને કોલકાતાને નિકટ લાવશે!

નેશનલ હાઈવે ઑથોરિટી ઑફ ઇન્ડિયાએ છ લેન ગ્રીનફિલ્ડ વારાણસી-રાંચી-કોલકાતા એક્સપ્રેસ-વે માટે તજવીજ ઝડપી બનાવી છે. ૬૧૦ કિલોમીટર લાંબો કોરિડોર ઉત્તર પ્રદેશમાં વારાણસી, ઝારખંડમાં રાંચી અને પશ્ચિમ બંગાળમાં કોલકાતાને જોડતો રૂટ ગોઠવણી સાથેનો એક્સેસ-નિયંત્રિત એક્સપ્રેસ-વે બનવાનો છે. એક્સપ્રેસ-વે નેશનલ હાઈવે ૧૯ અને વારાણસી રિંગ રોડ (રેવાસા ગામ પાસે)ના જંક્શનથી શરૂ થઈ અને પશ્ચિમ બંગાળમાં હાવડા જિલ્લામાં ઉલબેરિયા નજીક પૂર્ણ થશે. તે પશ્ચિમ બંગાળમાં ૨૪૨ કિમીનું અંતર કાપશે.

વારાણસીથી શરૂ થતો ગ્રીનફિલ્ડ કોરિડોર પશ્ચિમ બંગાળના પુરુલિયા અને બાંકુરા, પશ્ચિમ મેદિનીપુર, હુગલી અને હાવડાને જોડતો કોલકાતા પહોંચશે.

૩૦૦૦૦ કરોડના ખર્ચે બાંધવામાં આવનાર, એક્સપ્રેસ-વેની મોટી આર્થિક અસરો છે, કારણ કે તે પૂર્વ ભારતનાં મુખ્ય ખનિજનો મહત્ત્વપૂર્ણ ઔદ્યોગિક માર્ગ બનશે. જેને વડાપ્રધાન ગતિશક્તિ સાથેના તાલમેલના ભાગરૂપે મુખ્ય ઔદ્યોગિક નોડ સાથે જોડવામાં આવશે.