નવી પેઢી કચ્છનાં સૂડી - ચપ્પુ ઉદ્યોગથી વિમુખ થતી જાય છે

એક જમાનામાં કચ્છનાં સૂડી અને ચપ્પુની દેશઆખામાં માંગ રહેતી. હાથ બનાવટની તલવાર, ઢાલ પણ દૂર દૂર સુધી જતાં હતા. આજે આધુનિક મશીનરીના યુગમાં હાથબનાવટની વસ્તુઓ મોંઘી સાબિત થઈ રહી છે. તે લેનારો વર્ગ ઘટી રહ્યો છે, તેને યોગ્ય બજાર મળતાં નથી.

- સુચિતા બોઘાણી કનર

અનેક હસ્તકલાના પિયર સમા કચ્છમાં બનતાં સૂડી - ચપ્પુ, તલવાર, ઢાલ કે કટારી એક જમાનામાં દેશઆખામાં વેચાતાં હતાં, પરંતુ આજે મશીનથી બનતી વસ્તુઓનું ચલણ વધ્યા પછી હાથબનાવટની વસ્તુઓ લેના૨ો વર્ગ ઘટતો જાય છે. તેથી સૂડી - ચપ્પુનો પરંપરાગત ઉદ્યોગ પણ ભાંગી રહ્યો છે. સરકારી સહાયના અભાવે આ કામ કરનારા કારીગરો ઘટી રહ્યા છે. પ્રવાસન વિકસ્યા પછી કચ્છમાં આવીને યાદગીરી માટે સૂડી - ચપ્પુ ખરીદનારા લોકોની સંખ્યા વધી છે, એ ખરું, પરંતુ હાથેથી મહેનત કરીને, બારીક નક્શીકામ સાથે લોખંડમાંથી બનેલી આવી વસ્તુઓ મોંઘી લાગવાથી લોકો રોજબરોજના ઉપયોગ માટે મશીન બનાવટની વસ્તુઓ પર પસંદગી ઉતારી રહ્યા હોવાથી હાથબનાવટનું કામ કરનારા કારીગરોની મુશ્કેલીઓ વધે છે. તેથી આ વ્યવસાયમાં નવી પેઢી આવવાનું ટાળે છે. આ ઉદ્યોગને સરકારી સહાય, સસ્તો કાચો માલ, વ્યવસ્થિત માર્કેટ મળે તે જરૂરી છે. તેવી જ રીતે તલવાર, ભાલા કે કટાર જેવી વસ્તુઓ હથિયાર ગણાતી હોવાથી તેના વેચાણમાં પણ મુશ્કેલી પડે છે. નવા જમાના મુજબ ઓનલાઇન માર્કેટિંગથી આ વસ્તુઓ વેચનાર માટે પણ અનેક અડચણો આવે છે.