સિનેમા સિર્ફ સિનેમા હૈ, મરતે દમ તક!

સિંગલ થિયેટરમાં જઈને, એક પ્રકારના ધૂળિયા વાતાવરણમાં, ખારી સિંગ ખાતાં ખાતાં ફિલ્મો જોનારા માટે ‘સિનેમા મરતે દમ તક' એક જૂના જમાનાના સંભારણારૂપ છે. સામાન્ય દર્શકની યાદો છે જે સવારના શૉમાં ફિલ્મો જોવા જતા, જે સિંગલ થિયેટર્સની લાઇનમાં ઊભા રહેતા. નેટફિફ્લક્સ કે ઍમેઝોન પર બની રહેલી અઢળક મૉડર્ન સિરીઝો કરતાં આ સિરીઝ આગળ છે.

- પાર્થ દવે

સિનેમાનો એ, બી, સી, ડી જેવો કોઈ ગ્રેડ કે ક્લાસ નથી હોતો. સિનેમા સિનેમા હોય છે.-આવું ઘણા લોકો કહે છે, પણ સિનેમામાં ક્લાસ હોય છે જે તેના કન્ટેન્ટ, વિષય, નિર્માણ તથા કલાકારોથી નક્કી થતો હતો અને થાય છે. હિન્દી ફિલ્મોમાં ૧૯૯૦થી ૨૦૦૦ના દાયકા વચ્ચેનો સમય બોલિવૂડમાં બી ગ્રેડ ફિલ્મો માટે ચર્ચાસ્પદ રહ્યો જેમાં હોરર, ખૂન-ખરાબા અને કામુકતાથી ભરપૂર ફિલ્મો બની. આ ફિલ્મોમાં મુખ્ય પ્રવાહની ફિલ્મોના કલાકારો કે નિર્દેશક-નિર્માતા નહોતા જોવા મળતા. આ ફિલ્મોની પોતાની અલગ દુનિયા હતી અને આ ફિલ્મો અમુક-તમુક સિંગલ થિયેટર્સમાં ચાલતી હતી. યા તો તેના મોર્નિંગ શો જોવા મળતા. અત્યારે ઇન્ટરનેટના વિસ્ફોટના સમયમાં આજની પેઢીને કદાચ નવાઈ લાગે કે માનવામાં ન આવે, પણ એ દૌરમાં ‘મોર્નિંગ શો'નો અલગ - રોમાંચક અર્થ થતો! ઓટીટી પ્લેટફોર્મ એમેઝોન પ્રાઇમ વીડિયોની ડોક્યુ-સિરીઝ‘ સિનેમા મરતે દમ તક'માં આ સમયને ફરી જીવંત કરવામાં આવ્યો છે.

ફિલ્મ દિગ્દર્શક દિલીપ ગુલાટી

આશરે ૩૫થી ૪૦ મિનિટના ૬ એપિસોડની આ સિરીઝ ‘મર્દ કો દર્દ નહીં હોતા' અને ‘મોનિકા, ઓ માય ડાર્લિંગ' બનાવનાર વાસન બાલાએ ડિરેક્ટ કરી છે. ‘સિનેમા મરતે દમ તક’માં નાઇઝિના દૌરના ચર્ચિત સર્જકો વિનોદ તલવાર, દિલીપ ગુલાટી, કિશન શાહ અને જે. નીલમની જિંદગીનું દસ્તાવેજીકરણ થયું છે. તદુપરાંત તેઓ પોતાની શૈલીની ફિલ્મ બનાવે તે માટેનું તેમને બજેટ પણ અપાયું છે! અને તે ફિલ્મ-મેકિંગને શૂટ કરીને આ સિરીઝમાં પીરસવામાં આવ્યું છે! અને તેમાં જોવાસાંભળવા મળે છે કે, કઈ રીતે આ સર્જક પોતાની ફિલ્મો બનાવતા. ‘સિંદૂર ઔર બંદૂક’, ‘ખૂની પૂજા’, ‘રાત કે અંધેરેમેં' તથા ‘ તેરી તલાશમેં' જેવી ફિલ્મો બનાવનારા વિનોદ તલવાર કહે છે કે, ‘મારી પાસે સ્ટાર કાસ્ટ નહોતી. મારે દર્શકને આકર્ષવા અણઘડ પોસ્ટર બનાવવા પડતાં!'