ઈગલ એક્ટ

ઈગલ એક્ટ જો અમલમાં આવશે તો ભારતીયો, જેઓ આજે વિઝા મેળવવા માટે, એમની પિટિશન કરન્ટ થાય એ માટે વર્ષોની વાટ જુએ છે એ વાટ જોવાના સમયમાં સારો એવો ઘટાડો થશે

- ડો.સુધીર શાહ

એક હજાર પેસેન્જર અને પાંચસો કપ્તાન, નાવિકો અને અન્ય કાર્યકરો આમ પંદરસો વ્યક્તિઓ ધરાવતી શિપ મધદરિયે એન્જિનની ખરાબીના કારણે ડૂબવા લાગી. લોકોને બચવા માટે દસ નાની-નાની હોડીઓ હતી. એક હોડીમાં સો જણા જ બેસી શકે એટલી ગોઠવણ હતી. શિપ ડૂબવા લાગી એટલે બધા હોડીઓમાં બેસીને જીવ બચાવવાની કોશિશ કરવા લાગ્યા. એક હજાર વ્યક્તિઓ તો એ દસ હોડીઓમાં બેસી ગઈ, પણ બાકીના ૫૦૦ દરિયામાં ડૂબવા લાગ્યા. જે લોકો હોડીમાં બેઠેલા હતા એમાંનાં ઘણાંની પત્ની, પતિ, બાળકો તેમ જ મિત્રો એ પાંચસો ડૂબતી વ્યક્તિઓમાં હતાં. દરેક પેસેન્જરે પોતાનાં સગાંવહાલાંને બચાવવા એમને પોતાની હોડીમાં લેવાનો પ્રયાસ કર્યો. વધારાની વ્યક્તિઓ પ્રવેશી અને એ બધી જ હોડીઓ વધારાની વ્યક્તિઓના વજનના કારણે ડૂબી ગઈ.

વિશ્વના દેશોની કંઈક આવી જ પરિસ્થિતિ છે. એક સમયે ચીનની વસતિ ખૂબ જ વધારે હતી. એ કારણે એ દેશની પ્રગતિ દેખાતી નહોતી. આજે ભારતની વસતિ વધી છે. આ કારણે આપણાં શહેરો ઊભરાય છે. ટ્રાફિક જામ થાય છે. શાળાઓમાં, કૉલેજોમાં, હૉસ્પિટલોમાં જગ્યા નથી મળતી. બધાને નોકરી નથી સાંપડતી. આપણા દેશની પ્રગતિ, ખનિજ સંપત્તિ, ખેતીવાડીની ઊપજ, રાષ્ટ્રની ધનસંપત્તિ, લોકોની આવક આ બધાં કરતાં વસતિ અનેક ગણી વધારે છે. આપણો દેશ ગમે તેટલી પ્રગતિ કરે, પણ એ દેખાતો નથી.