હેલો.. વડોદરા સંસ્કાર નગરી વડોદરા ફરવા માટે પણ બેસ્ટ છે

ગુજરાતમાં આમ તો દરેક શહેરમાં કોઈ વિશેષતા એવી હોય છે જ જ્યાં જવાનું ગમે, પરંતુ આજે વાત કરવી છે રાજ્યની સંસ્કાર નગરીની. જી હા, વિશ્વામિત્રી નદીના કાંઠે આવેલું વડોદરા શહેર પોતાની આગવી ઓળખ લઈને ઊભું છે, ત્યાં અનેક સ્થળો છે જેનો વારસો કંઈક જુદી જ કહાની કહે છે.

- હેતલ રાવ

વડોદરાનું નામ પહેલા વટસ્ય ઉદરે હતું. કહેવાય છે કે વિશ્વામિત્રી નદીના કાંઠે ઘણા વડ હતા અને આ વડની છત્રછાયામાં શહેર વિકસ્યું, માટે તેનું નામ વટસ્ય ઉદરે પડ્યું, જે એક સંસ્કૃત શબ્દ છે. ધીમે-ધીમે વટસ્ય નામ વડોદરામાં ફેરવાયું. ઘણા લોકો વડોદરાને બરોડાના નામથી પણ સંબોધે છે. આ ઉપરાંત પણ વડોદરા સંસ્કાર નગરી, કલાનગરી, વડનગરી અને ગાયકવાડી નગરી તરીકે પણ ઓળખ ધરાવે છે. ગુજરાતના મહત્ત્વનાં શહેરો પૈકીનું એક શહેર એટલે વડોદરા જ્યાં અનેક એવાં સ્થળો છે, જે ઐતિહાસિક વારસો ધરાવે છે. ઘણું બધું જોવાલાયક અને ફરવાલાયક છે. તો ચાલો, વડોદરા નગરીની લટાર મારવા..

લક્ષ્મી વિલાસ મહેલ

લક્ષ્મી વિલાસ મહેલ એ વડોદરાના ગાયકવાડ રાજવંશનો મહેલ છે. આ મહેલનું નિર્માણ ૧૮૯૦માં મહારાજા સયાજીરાવ ગાયકવાડના કહેવાથી કરવામાં આવ્યું હતું. મહેલની અંદર ધ્યાનાકર્ષિત ધાતુની મૂર્તિઓ, જૂનાં હથિયારો, મોઝેઇક અને ટેરાકોટા રાખવામાં આવ્યાં છે. કહેવાય છે કે આ મહેલનું જ્યારે બાંધકામ કરવામાં આવ્યું હતું ત્યારે તેની અંદાજિત કિંમત ૩,૦૦,૦૦૦ સ્ટર્લિંગ પાઉન્ડ હતી.

પ્રતાપ વિલાસ પેલેસ

પ્રતાપ વિલાસ પૅલેસ વડોદરા શહેરના ખ્યાતનામ વિસ્તાર લાલબાગ નજીક આવેલ ગાયકવાડી જમાનાનો મહેલ છે. આ મહેલ ઈ.સ. ૧૯૧૪ની સાલમાં બનાવવામાં આવ્યો હતો. આશરે ૫૫ એકર જમીનમાં બગીચા અને ઘાસની લીલીછમ ચાદર વચ્ચે પ્રતાપ વિલાસ મહેલ આગવી ઓળખ ધરાવે છે. વર્તમાન સમયમાં આ મહેલને ભારતીય રેલવેની સ્ટાફ કૉલેજમાં રૂપાંતરિત કરવામાં આવ્યો છે. આ કૉલેજ ભારતીય રેલવેમાં જોડાયેલ નવા તેમ જ જૂના ઓફિસર અને એક્ઝિક્યુટિવ કક્ષાના માણસોને તાલીમ આપે છે.

મહારાજા ફતેહસિંહ મ્યુઝિયમ