પૂર્વનિયોજિત ઇરાદાઓ ખતરનાક હોય છે?

જો તમે પહેલેથી તમારું સ્ટેટસ ચેન્જ યા એડ્જસ્ટ કરવાનો વિચાર કર્યો હોય તો એ અમેરિકાના ઇમિગ્રેશનના કાયદા હેઠળ ગુનો છે

- ડો.સુધીર શાહ

‘જીતુભાઈ, તમારો દીકરો યુએસ સિટીઝન બની ગયો ને?’ હેગિંગ ગાર્ડનમાં મૉર્નિંગ વૉક કરવા વર્ષોથી નિયમિત જતા જીતુભાઈ મહેતાને એમના જેવા જ બીજા મૉર્નિંગ વૉક ઉપર આવતા મનુભાઈ શાહે પ્રશ્ન કર્યો.

‘હા, હા, કેમ?’

“બસ, તો હવે તમારી પાસે જે બી-૧ બી/૨ વિઝા છે એના ઉપર અમેરિકા પહોંચી જાઓ. તમારા દીકરાને કહો કે તમારા માટે ‘ઇમિજેટ રિલેટિવ' કૅટેગરી હેઠળ ગ્રીનકાર્ડની પિટિશન દાખલ કરે. સાથેસાથે ‘ઍડ્જસ્ટમૅન્ટ ઓફ સ્ટેટસ'ની અરજી પણ કરે. તમે અમેરિકામાં રહી શકશો અને તમારી પિટિશન એપ્રૂવ્ડ થાય એટલે સ્ટેટસ ઍડ્જસ્ટ કરીને નોન-ઇમિગ્રન્ટ બી-૧/ બી-૨માંથી ઇમિગ્રન્ટ કરાવી શકશો. એ દરમિયાન આરામથી દીકરા, વહુ અને ગ્રાન્ડસન સાથે અમેરિકામાં મજા કરી શકશો. તમે તો બિઝનેસમેન છો એટલે અમેરિકામાં બિઝનેસ પણ શરૂ કરી શકશો.’’

‘મનુભાઈ, જો હું અમેરિકામાં રહીને ગ્રીનકાર્ડ મેળવી શકું તો તો બહુ સારું. મને ઇન્ટરવ્યૂ આપવાની બહુ બીક લાગે છે. તબિયત ખૂબ નરમગરમ રહે છે. શ્વાસની તકલીફ છે. કદાચ મેડિકલમાં ફેલ થઈ શકું. બીજું, છેલ્લાં ત્રણ ચાર વર્ષથી અમેરિકા જઉં છું ત્યારે ત્યાં પાંચ-છ મહિના રહું છું અને દીકરાના સ્ટોરમાં કામ કરું છું. એ વાતની ઇન્ટરવ્યૂમાં ખબર પડી જાય તો મુશ્કેલી થાય એટલે જો અમેરિકામાં હું સ્ટેટસ ઍડ્જસ્ટ કરી શકું તો ખૂબ સારું.’