વર સંશોધન પ્રોજેક્ટ!

ચાઇના ગવર્મેન્ટે વસતીના વધતા દરમાં ઓટ ન આવે એવા રાષ્ટ્રહિત માટે, એવો ફતવો બહાર પાડેલો કે છોકરો કે છોકરી અનુક્રમે ૨૧ વર્ષ કે ૧૮ વર્ષ પૂરાં કરે કે તરત જ માતા-પિતાએ એમનાં (એમનાં એટલે કે પેલાં છોકરા-છોકરીનાં!) યુદ્ધના ધોરણે લગ્ન કરાવી દેવાં

- હર્ષદ પંડ્યા ‘શબ્દપ્રીત'

થોડા સમય પહેલાં એવા સમાચાર હતા કે એ જાણ્યા પછી મોટા ભાગનાં પરણેલાંઓને ધોધમાર ઈર્ષાઓ થવા માંડી!

સમાચાર જાણે એમ હતા કે, ચાઇના ગવર્મેન્ટે વસતીના વધતા દરમાં ઓટ ન આવે એવા રાષ્ટ્રહિત માટે, એવો ફતવો બહાર પાડેલો કે છોકરો કે છોકરી અનુક્રમે ૨૧ વર્ષ કે ૧૮ વર્ષ પૂરાં કરે કે તરત જ માતા-પિતાએ એમનાં (એમનાં એટલે કે પેલાં છોકરા-છોકરીનાં!) યુદ્ધના ધોરણે લગ્ન કરાવી દેવાં, જો એમ કરવામાં કોઈ વિલંબ કરશે તો મોટા ચમરબંધીનેય છોડવામાં નહીં આવે, એને કડકમાં કડક સજા કરવામાં આવશે. જોકે એક વાતની અહીં સ્પષ્ટતા કરવી જરૂરી છે કે ‘ચમરબંધી’ અને ‘કડકમાં કડક સજા’ એ બંને શબ્દોના અર્થ ચાઇના અને ઇન્ડિયામાં એક સરખા જ થતાં હશે એવા ભ્રમમાં રહેવાની જરૂર નથી.

એક કા દો અથવા સિંગલના ડબલ કરવાની પ્રવૃત્તિ, માત્ર નાણાં જગતમાં કે બિઝનેસ ફિલ્ડમાં જ થતી હોય એવું નથી, વ્યવહાર જગતમાં પણ આ પ્રવૃત્તિ થતી જ હોય છે. ફરક એટલો કે વ્યવહાર જગતમાં થતી આ પ્રવૃત્તિ, ક્યાં તો કમુરતાં શરૂ થતાં પહેલાં, ક્યાં તો કમુરતાં પૂરાં થતાં જ, તો ક્યારેક અખાત્રીજના દિવસે કે એ પછી શરૂ થઈ જતી હોય છે. જેવા જેના યોગ, જેવા જેના સંજોગ!

કેટલાક પ્રેમીઓ લગ્ન કરવાની બાબતે મુહૂર્તના મોહતાજ નથી હોતાં. કદાચ આ કારણે જ એ લોકોને સ્વાવલંબી પ્રેમીઓ કે સ્વાવલંબી કપલ્સ તરીકે નવાજવામાં આવે છે.

જોકે આજે - ૨૧મી સદીમાં પણ કેટલાંક યુવક-યુવતીઓ આ બાબતે - મતલબ કે લગ્ન કરવા જેવા સાહસ બાબતે સ્વાવલંબી નથી હોતાં. પહેલાં એવું કહેવાતું કે, ‘દીકરી ને ગાય દોરે ત્યાં જાય’ આજે હવે એવું નથી રહ્યું. આજે હજુ પણ ક્યાંક ક્યાંક એવું કહેવાતું હોય છે કે, ‘દીકરી ને ગાય, જ્યાં ધકેલે ત્યાં જાય.’ કોઈકને ‘દોરવું’ અને ‘ધકેલવું’ એમાં ફરક છે સાહેબ!

‘હલો. . . હલો. .. હા, આ... ટાવર પકડાતું નથી.’

‘અરે યાર, મેં તમને ટાવર શોધવા મોકલ્યા છે કે વર શોધવા? હલો.. હલો.. કપાઈ ગયો..' બાબુ બૉસે ફોન મૂકતાં બબડાટ કર્યો, ‘આના કરતાં તો લેન્ડલાઇન ફોન હતો એ શું ખોટો?’

‘કોણ કપાઈ ગયું?’ મિસિસ બાબુએ મતલબ કે બિબતાએ રસોડામાંથી બૂમ પાડી.

‘સંપર્ક.’

‘કોનો?’

‘આપણો.’