‘ગદર-૨’ પહેલાં જેવી કમાલ કરી શકશે?

સિક્વલ બે રીતે બને. એક તો ખરેખર વાર્તાની માંગ હોય અને બીજી, અગાઉની સફળતાની રોકડી કરવા. ‘ગદર’ના કેસમાં બીજું કારણ વધુ લાગી રહ્યું છે. ‘ગદર’ આવ્યાને વરસો થઈ ગયાં. આ દરમિયાન તમામ ક્ષેત્રે ઘણા ફેરફારો થઈ ચૂક્યા છે, ત્યારે ૧૧ ઑગસ્ટે આવી રહેલી ‘ગદર-૨’ને દર્શકો સ્વીકારશે? ‘ગદર'ની રિ-રિલીઝને કેવો રિસ્પોન્સ મળશે? બ્લૉકબસ્ટર ‘ગદર' ફિલ્મની રસપ્રદ વાતો વાંચો..

- પાર્થ દવે

૨૨ વર્ષ પહેલાં ‘ગદર’ નામનું તોફાન આવ્યું હતું. શક્તિમાન તલવારે લખેલી અને અનિલ શર્માએ ડિરેક્ટ કરેલી ‘ગદર’, આમિર ખાનની ‘લગાન’ સાથે રિલીઝ થઈ હતી. બોક્સ ઓફિસ ઉપર બંને ફિલ્મ સુપરહિટ રહી હતી. રિપોર્ટ મુજબ, ૧૯ કરોડમાં બનેલી ‘ગદરે’ ૧૩૩ કરોડની કમાણી કરી હતી. સની દેઓલનું ડંકી ઉપાડવું, તારા સિંહ અને શકીનાની પ્રણય કથા, અમરીશ પુરીનો આક્રોશ, ભારત - પાકિસ્તાનની લડાઈ, ટ્રેનની ફાઇટ સિક્વન્સ, દમદાર ડાયલોગ્સઃ આ બધું જ લોકોને ખૂબ ગમ્યું હતું.

વાત એમ છે કે, ૧૧ ઓગસ્ટે ‘ ગદર-૨' રિલીઝ થઈ રહી છે. તે પહેલાં મેકર્સ ૯મી જૂને ‘ગદર’ ફિલ્મ રિ-રિલીઝ કરી રહ્યા છે. રિપોર્ટ મુજબ ‘ગદર’ મુંબઈ, લખનઉ, ઇન્દોર અને જયપુરઃ આ ચાર શહેરનાં થિયેટરોમાં રિલીઝ કરવામાં આવશે. મેકર્સ રિ-રિલીઝની સાથે ‘ ગદર-૨’નું પ્રમોશન શરૂ કરશે.