ક્યાં? ક્યારે? કેમ? - જ્યોતિ ભટ્ટની અનોખી જાતકકથા

આપણી ભારતીય કલા માત્ર સંપન્ન વર્ગ પૂરતી સીમિત નથી કે નથી એ આર્ટ સ્ટુડિયોની દીવાલો વચ્ચે બંધાયેલી

- પ્રિયંકા જોષી

સુવિખ્યાત જ્યોતિ ભટ્ટની તસવીરકારીને નિહાળતાં આ વિધાન ખરા અર્થમાં સમજાય છે. કળાનું ખૂબ જ લોકપ્રિય સ્વરૂપ ફોટોગ્રાફી દ્વારા પોતાના આગવા દર્શનને અભિવ્યક્ત કરવાની કુશળતા જ્યોતિ ભટ્ટની તસવીરો દ્વારા વ્યક્ત થાય છે. તેથી તેમની તસવીરો photo journalismથી પાંચ ડગલાં આગળ ઊભી રહે છે. આપણી ભારતીય કલા માત્ર સંપન્ન વર્ગ પૂરતી સીમિત નથી કે નથી એ આર્ટ સ્ટુડિયોની દીવાલો વચ્ચે બંધાયેલી. કલા આપણા જીવનનો ભાગ છે. કલા જીવનનો આનંદ અને ઉમંગ છે જે દરેક જન વ્યક્તિગત કે સામુદાયિક સ્તરે અભિવ્યક્ત કરે છે. કલા જીવનનો શણગાર છે. કલા સાથે અનેક માન્યતાઓ અને પ્રથાઓ જોડાયેલાં છે, પરંતુ પરંપરાગત હોવા છતાં કલાનો ઉદ્દેશ જીવનને નિત્યનૂતન બનાવવાનો છે.

તાજેતરમાં ‘કલાતીર્થ’ દ્વારા જાતકકથા જ્યોતિભાઈની આ યાત્રાનાં પુષ્પો એકત્ર કરીને કલાજગતને અર્પણ કરવાનું કાર્ય થયું છે. પ્રગટ થયેલ કલાગ્રંથ-કલાગંગોત્રી-૯: ‘ક્યાં? ક્યારે? કેમ?' જ્યોતિભાઈના કલામય જીવનનું રસપાન કરાવે છે. આ પુસ્તકમાં હૃદયસ્પર્શી છબીઓ અને તેની સાથે તેની પ્રાસંગિક કથાઓનો સમાવેશ કરવામાં આવ્યો છે. આ કલાગ્રંથ ફોટોલૉગ રૂપે પ્રકાશિત થયો છે. આ ગ્રંથમાં જ્યોતિ ભટ્ટનો પરિચય એક સાહિત્યકાર તરીકે પણ થાય છે. પ્રત્યેક શ્વેત-શ્યામ છબીઓ સાથે સંકળાયેલા વિવિધ રંગી પ્રસંગોનું આલેખન ભાતીગળ લોકસંસ્કૃતિની રંગછાબ બની રહે છે. પાને-પાને સંસ્મરણોની મહેક તો અનુભવાય છે જ સાથે-સાથે જે-તે સ્થળ-લોક-કાળનું પ્રશિષ્ટ દસ્તાવેજીકરણ પણ મળે છે.