‘બાર્બનહાઇમર' અને બોક્સ ઓફિસ

હોલિવૂડની ૨ મોટી ફિલ્મો ‘ઓપનહાઇમર' અને ‘બાર્બી’ વચ્ચે ક્લેશ બાર્બી ડોલના બિઝનેસમાં થતો ઘટાડો જોઈને તેની સર્જક ‘મટેલ' કંપનીએ વોર્નર બ્રધર્સ સાથે પડદા પાછળ રહીને ‘બાબી’ નામની ફૂલ લેન્થ ફિલ્મ બનાવી નાખી છે. એક વખત હતો જ્યારે બાર્બીના તમામ મોડેલનું વર્ષે સરેરાશ ૧.૩૫ અબજ ડોલરનું વેચાણ થતું હતું પણ ૨૦૨૦ પછી તેમાં ઘટાડો થયો છે.

- પાર્થ દવે

ગત શુક્રવાર એટલે કે ૨૧ જુલાઈ બોક્સ ઓફિસ અને સિનેરસિકો માટે ખાસ હતો, કેમ કે આ દિવસે હોલિવૂડની બે મોટી ફિલ્મો રિલીઝ થઈ. અફ્લાતૂન નિર્દેશક ક્રિસ્ટોફર નોલાનની ‘ઓપનહાઇમર’ અને બીજી ગ્રેટા ગર્વિંગની ફિલ્મ ‘બાર્બી’. બંને ફિલ્મો તદ્દન અલગ જોનરની હોવાથી બોક્સ ઓફિસ પરનો ક્લેશ હટકે હતો. બંને વચ્ચેની સ્પર્ધાને સોશિયલ મીડિયા પર લોકોએ ‘બાર્બેનહાઇમર' એવું નામ પણ આપ્યું હતું. ‘ઓપનહાઇમર’ દુનિયાનો પહેલો પરમાણુ બોમ્બ બનાવનારા ફિઝિસિસ્ટ રોબર્ટ જે. ઓપનહાઇમરના જીવન પર આધારિત ફિલ્મ છે, તો ‘બાર્બી' હળવીફુલ કોમેડી-ડ્રામા જોનરની ફિલ્મ છે.