બદલાઈ રહેલા રંગરૂપ સાથે ઉપલબ્ધ છે ખાદી

હવે ખાદીમાં જે ટ્રેન્ડ વિકસી રહ્યો છે તે યુવાનોને પણ આકર્ષિત કરવામાં સફળ થઈ રહ્યો છે. વર્તમાન સમયમાં જુદા-જુદા પ્રકારની ખાદી ઉપલબ્ધ બની છે. ખાદીને સિલ્ક, વૂલ અને કોટનની સાથે મિક્સ કરવામાં આવી રહી છે. સિલ્ક અને ખાદીનાં વસ્ત્રોમાં ૫૦-૫૦ ટકાનો રેશિયો રાખવામાં આવે છે. આ ફેબ્રિક મોંઘું છે, કારણ કે તે રોયલ લૂક આપે છે.

રાષ્ટ્રની પ્રગતિને ધ્યાનમાં રાખીને મેક ઇન ઇન્ડિયા, આત્મનિર્ભર ભારત અને સ્વદેશી બનાવટની વસ્તુઓની વાત ચાલી રહી હોય ત્યારે ફેશન ઇન્ડસ્ટ્રી પણ કેવી રીતે બાકાત રહે અને એટલે જ હવે ફેશન ઇન્ડસ્ટ્રીમાં ખાદી પણ નવા રંગરૂપ સાથે જમાવટ કરી રહી છે. ભારતની સ્વતંત્રતાના આંદોલન દરમિયાન ખાદીએ સ્વદેશની ઓળખ પ્રાપ્ત કરી હતી અને રાષ્ટ્રપતિ મહાત્મા ગાંધીએ ખાદીના બ્રાન્ડ એમ્બેસેડર બનવાનું કામ કર્યું હતું. ત્યાર બાદ તો ઘરે ઘરે ખાદીના કાપડમાંથી બનેલાં કપડાં પહેરવાની શરૂઆત થઈ હતી. સમય જતાં વળી પાછી ખાદી ભૂલાવવા લાગી. તેની પાછળનું કારણ ખાદીમાં ઉપલબ્ધ મર્યાદિત રંગો અને પેટર્નને માનવામાં આવતું. ખૂબ સીમિત રંગો અને પેટર્ન સાથેનાં કપડાં ખાદીના કાપડમાં ઉપલબ્ધ બનતાં. પરિણામે ફેશન જેવી ફાસ્ટ ગ્રોઇંગ ઇન્ડસ્ટ્રીમાં ખાદી ભુલાતી ગઈ. જોકે હવે પાછું ખાદીનાં કપડાંનો ઉપયોગ શરૂ થયો છે. ખાદી ફેશન ઇન્ડસ્ટ્રીમાં મહત્ત્વનું સ્થાન મેળવી રહી છે. તેની પાછળનું કારણ છે ખાદીમાં થયેલા જુદા-જુદા સંશોધનાત્મક પ્રયોગોમાં મળેલી સફ્ળતા. ખાદી હવે ઘણા બધા રંગોમાં ઉપલબ્ધ છે. જુદી-જુદી સ્ટાઇલ અને પેટર્ન સાથે ખાદી યુવાનોને આકર્ષિત કરી રહી છે. આપણે ત્યાં ખાદીનાં કપડાંને લઈને હવે વિવિધ ફેશન શોનું પણ આયોજન કરવામાં આવી રહ્યું છે.