ચંદ્રયાન-૩: મહિલા વિજ્ઞાનીઓની અમૂલ્ય ભેટ સાથે જ વિચારવંત સંદેશ

વર્ષ ૨૦૨૨માં એક મહિલા વિજ્ઞાનીનું સ્ટેટમૅન્ટ ખૂબ વાયરલ થયું હતું. તેમનું નિવેદન હતું - બની શકે આવનારા દિવસોમાં મીટિંગો અવકાશમાં પણ યોજાઈ શકે

૨૩ આગસ્ટ, ૨૦૨૩ની આ સાંજે વિક્રમ લૅન્ડરે પ્રજ્ઞાન રોવરને પોતાની સાથે લઈને ચંદ્રના દક્ષિણ ધ્રુવની જમીન પર સફળતાપૂર્વક ઉતરાણ કર્યું ત્યારે ઇસરોના વિજ્ઞાનીઓએ પોતાના જ્ઞાન અને વિજ્ઞાન થકી સમગ્ર વિશ્વમાં પોતાની તાકાત, આંતરિક શક્તિ, અથાક મહેનત, સૂઝબૂઝનો પરિચય વિશ્વને કરાવ્યો. ઇસરોની ચંદ્રયાનની ટીમમાં ૫૪થી વધુ મહિલા વિજ્ઞાનીઓ સામેલ હતી. અધિકૃત આંકડો છે. કેટલાક રિપોર્ટ અનુસાર સમગ્ર ટીમમાં ૧૦૦થી પણ વધુ મહિલાઓએ ચંદ્રયાન-૩ મિશનને સફળ બનાવવામાં જવાબદારી નિભાવી છે. ચંદ્રયાન-૩એ જ્યારે ચંદ્ર પર ઉતરાણ કર્યું ત્યારે દેશવિદેશના લોકોએ વિજ્ઞાનની દુનિયાના નવા મહિલા આઇકોનનું અવતરણ જોયું. નારીશક્તિ પહેલાં પણ હતી, આજે પણ છે. બસ, લોકો તેમની શક્તિને અન્ડરએસ્ટિમેટ કરતા રહેતા હતા અને કરે છે, પણ ઇસરોનાં મહિલા વિજ્ઞાનીઓએ માત્ર પોતાની જ નહીં, સમગ્ર ભારતની મહિલાઓની શક્તિનો પરિચય સમગ્ર વિશ્વને કરાવ્યો છે. ઉનાળાનો ધોમધખતો તાપ હોય કે ચોમાસાના અનરાધાર વરસાદ, કોઈ ગામડાં કે શહેરમાં થાક્યા વિના-હાર્યા વિના હાથલારી ચલાવતી મહિલા હોય કે ઇસરોની વિજ્ઞાનીઓ, સ્ત્રી ક્યારેય સામાન્ય નહોતી. એ અપ્રતિમ પ્રતિભા અને પ્રચંડ તાકાતની સ્વામિની હતી અને ઇસરોની મહિલા વિજ્ઞાનીઓએ શ્રમજીવી મહિલાઓથી લઈને દરેક સ્તરની મહિલાઓને આ માન-સન્માન અપાવવામાં અમૂલ્ય યોગદાન આપ્યું છે તે સ્વીકારવું રહ્યું. કદાચ એમ કહી શકાય કે ભારતની બાળકીઓમાં કલ્પના ચાવલા કે સુનિતા વિલિયમ્સ જેવા બનવાની સાથે હવે રીતુ કરિધાલ, ટેસી થોમસ કે મીનલ રોહિત જેવા બનવાનું સપનું જોવાનું અને તેને પૂરું કરવા માટે પ્રયત્નશીલ બનવા માટેનું વિચારબીજ તેમણે રોપ્યું છે.