મધ્યપ્રદેશ-છત્તીસગઢ-મિઝોરમ મતપેટીમાં મતદારોએ શું આદેશ આપ્યો?

મિઝોરમ કરતાં બે મોટાં રાજ્યો મધ્યપ્રદેશ અને છત્તીસગઢનાં ચૂંટણી પરિણામો પર સૌની નજર વધારે છે. મધ્યપ્રદેશ અને છત્તીસગઢ બંને રાજ્યો મોટાં છે. ત્યાં કોંગ્રેસ અને ભાજપ વચ્ચે સીધી ટક્કર છે

ભારતના ચૂંટણી પંચે જ્યારથી પાંચ રાજ્યોમાં નિયમ અનુસાર વિધાનસભાની ચૂંટણીની જાહેરાત કરી છે, ત્યારથી તે રાજ્યોમાં રાજકીય પક્ષોની દોડધામ સ્વાભાવિક રીતે જ વધી ગઈ છે. પાંચ વર્ષ સુધી જેઓ વીઆઈપી હતા તે રાતોરાત કોમનમેન અને કોમનમેન હતા તે બધા વીઆઈપી બની ગયા! આપણી લોકશાહીમાં ચૂંટણીનો અવસર એવો છે કે કમ સે કમ ત્યારે તો જનતાજનાર્દનને લાગે જ છે કે દેશમાં એક નાગરિક તરીકે પોતાનુંય કંઈક વજૂદ છે તો ખરું! મતદારોને આકર્ષવા માટે ચૂંટણીના મેદાનમાં નેતાઓનાં પ્રવચનોમાં ક્યાંક ઊભરાતો પ્રેમ તો ક્યાંક નફરતી ઝંઝાવાત, ક્યારેક ઉપરછલ્લા જનતાના મુદ્દા તો ક્યારેક જનતાનું ધ્યાન ભટકાવવાના મુદ્દા, વચનોની લહાણીનું તો પૂછવું જ શું? એક એકથી ચડિયાતાં પ્રલોભનો, અનેકવિધ તરકીબો, ચૂંટણી સભાઓ, રોડ શૉ, ઘરે ઘરે સંપર્ક, આટલું ઓછું હોય તેમ મીડિયાનો ૨૪ કલાક સદુપયોગ-દુરુપયોગ બધું જ..! જૂની કહેવત મુજબ પ્રેમ અને યુદ્ધમાં બધું જ યોગ્ય, હવેના સમયમાં પ્રેમ, યુદ્ધ અને ચૂંટણીમાં બધું જ યોગ્ય..બધું બધાને સ્વીકાર્ય…!

વિચાર કરો, આવા અત્યંત કોલાહલ અને ભેદભરમના વાતાવરણ વચ્ચે મતદારોએ સ્વસ્થ મને પોતાનો નિર્ણય કરવાનો કે હવે પછીનાં પાંચ વર્ષ માટે કોને શાસનધુરા સોંપવી? આ લખાઈ રહ્યું છે ત્યારે પાંચ રાજ્યોમાંથી મધ્યપ્રદેશ, છત્તીસગઢ અને મિઝોરમમાં વિધાનસભાની ચૂંટણીનું મતદાન પૂરું થઈ ગયું છે અને મતદારોએ પોતાનો જનાદેશ મતપેટીમાં અંકિત કરી દીધો છે. સદ્નસીબે મતદાન પ્રમાણમાં વધુ થયું છે, પરંતુ પોતાની પસંદગીનો કળશ કોના માથે ઢોળ્યો છે તે જાણવા માટે આપણે ત્રીજી ડિસેમ્બર સુધી રાહ જોવાની છે. હાલ માત્ર આપણે છેલ્લા મહિનાઓ માં રાજકીય અને પ્રજાકીય સ્તરે જે વાતાવરણ જોયું, ભૂતકાળમાં જે-તે રાજ્યોની શું પરિસ્થિતિ હતી? અને હવે રાજકીય પક્ષો અને નેતાઓએ ચૂંટણી જીતવા માટે જે સારા-નરસા કે સાચા-ખોટા પ્રયત્નો કર્યા, તેમાં મતદારોનો મૂડ અંતિમ ક્ષણે કેવો રહ્યો હશે, તે સમજવા માટે નિષ્પક્ષ રહી એક તે પ્રયત્ન માત્ર કરવાનો છે.