બિજ-થિંગ - પ્રિયંકા જોષી કાલાપાનીઃ અસ્તિત્વ ટકાવી રાખવાની સંઘર્ષકથા

પોર્ટ બ્લેરમાં આવેલી ‘સેલ્યુલર જેલ'નો ઉલ્લેખ થયો છે, જ્યાં આપણા સ્વતંત્રતા સેનાનીઓને કેદ રખાયા હતા. આ જેલની ફરતે ઈંટોની દીવાલ નહીં, પણ દરિયાના પાણીની દીવાલ છે, જે અહીં આવનારને રોકી રાખે છે

કાલાપાની આ શબ્દ સાથે આપણી કાળી સ્મૃતિઓ જોડાયેલી છે. આજે વર્ષો બાદ પણ આંદામાન અને નિકોબાર ટાપુઓ પર આવેલી ‘સેલ્યુલર જેલ'ની મુલાકાત લેતાં પ્રવાસીઓનું મન વિક્ષુબ્ધ બની જાય છે. કહેવાય છે કે બ્રિટિશ શાસન હેઠળ અહીંના કેદીઓને આપવામાં આવતી ‘કાળાપાણીની સજા’ મૃત્યુદંડ પછીની સૌથી ભયંકર સજા હતી.

આપણને સહજ પ્રશ્ન થાય કે તેને ‘કાલાપાની’ શા માટે કહેવાતું હશે? સ્થાનિકોના કહેવા અનુસાર અસલમાં તે શબ્દ ‘કાલપાની’ છે, એટલે કે એકવાર જે અહીં આવે તેનું પાછા ફરવું અશક્ય છે. તેનું મુખ્ય કારણ અહીંનું અત્યંત વિષમ વાતાવરણ, અલ્પ સંસાધનો અને ચારે તરફથી ઘેરી વળતો દરિયાનો પટ જેને પાર કરવો જે-તે સમયે અશક્ય હતું. આપણને એવો પ્રશ્ન થાય કે ન થાય, પણ ડિરેક્ટર બિશ્વપતિ સરકારને પોતાના આંદામાન અને નિકોબારના પ્રવાસ દરમિયાન એવો સવાલ થયો કે આજના સમયમાં પણ જો આવી પરિસ્થિતિ સર્જાય અને ટાપુ પર આવેલા પ્રવાસીઓ પાછા જઈ ન શકે

તો? બસ આ કાલ્પનિક પરિસ્થિતિના આધારે આ વેબ સિરીઝ ‘કાલાપાની’ની ભૂમિકા રચાઈ અને તેનાથી પ્રેરાઈને બિશ્વપતિ સરકાર, સંદીપ સાકેત, અમિત ગોલાની અને નિમિષા મિશ્રાએ સાથે મળીને અત્યંત રોમાંચક પટકથા લખી.

હાલમાં જ Netflix પર રિલીઝ થયેલી વેબ સિરીઝ ‘કાલાપાની’એ રસિકોનું ધ્યાન ખેંચ્યું છે. આંદામાન-નિકોબાર ટાપુઓના પરિવેશમાં બનેલી આ સિરીઝ એક સર્વાઇવલ ડ્રામા છે. સાત ભાગમાં વહેંચાયેલી આ સિરીઝની સ્ક્રિપ્ટ અને સ્ક્રીનપ્લે તેનું સબળ પાસું છે. વર્તમાન સમય તરીકે વર્ષ ૨૦૨૭ને પસંદ કરવામાં આવ્યું છે. આજથી ચાર જ વર્ષ બાદના આ સમય સાથે દર્શકો સારી રીતે કનેક્ટ થઈ શકે છે.

પોર્ટ બ્લે૨ ૫૨ નવ વર્ષની ઉજવણી માટેનું ખાસ આયોજન કરવામાં આવ્યું છે. આ ઉત્સવ કોવિડ-૧૯ની મહામારી પછી આંદામાન-નિકોબાર ટાપુઓમાં રોજગારીની તકો ઊભી કરવા માટે અને તેની નબળી પડી ચૂકેલી આર્થિક પરિસ્થિતિને સુધારવા માટે ખૂબ અગત્યનો છે.