સંવેદનોની ‘અભિવ્યક્તિ'નો ઉત્સવ

અભિવ્યક્તિ સિટી આર્ટના વૈવિધ્યસભર કલા ઉત્સવનું પાંચમું સંસ્કરણ. અભિવ્યક્તિના મંચ પર પ્રસિદ્ધિ નહીં, મૌલિકતાનો મહિમા. ગુજરાતના કલાકારોને ઉત્તમ મંચ અને પ્રેક્ષકો ઉપલબ્ધ કરાવવાનો ઉદ્દેશ.

- પ્રિયંકા જોષી 

 

પ્રખ્યાત અમેરિકન સાહિત્યકાર માયા એન્જેલુ કહે છે કે - All great artistsdraw from the same resource human heart, which tells us we are all more alike than we are unalike.

આપણે સહુ ભિન્ન છીએ, પરંતુ એવી કેટલીક લાગણીઓ છે જે ભિન્ન લોકોના અંતરમાં સમાન રીતે જન્મે છે. માનવ માત્રમાં સુખ-દુ:ખ, આનંદ, ક્રોધ અને પ્રેમ જેવી લાગણીઓ રહેલી છે. તમામ મહાન કલાકારો પ્રેક્ષકો સાથે ઊંડું જોડાણ સ્થાપિત કરી શકે છે, કારણ કે તે માનવ હૃદયને સારી રીતે સમજે છે. તેઓ સમસ્તની અનુભૂતિને પોતાની કલામાં અવતરિત કરી શકે છે. તેથી જ સૌ તેમની કલાકૃતિઓમાં પોતાનો અંગત ભાવ ખોળી શકે છે. જ્યારે આપણે કોઈ કલાકૃતિ કે પ્રસ્તુતિ નિહાળીએ છીએ ત્યારે આપોઆપ તેનો ભાવ આપણાં મનમાં પણ પ્રગટ થઈ જાય છે. આપણી લાગણીઓ ભલે આગવી હોય પણ તેની અનુભૂતિ સાર્વત્રિક છે, તે અન્યને પણ થઈ શકે છે. આપણે સહુ આ રીતે જ એકમેકથી જોડાયેલા છીએ.

કલા જીવનનો આવિર્ભાવ છે. કલા જીવનમાંથી પ્રગટે છે અને તેને અર્થપૂર્ણ બનાવે છે. જરૂરી નથી કલા સૌંદર્યમાંથી જ ઊગે, જીવનની વિષમતાઓની વચ્ચે પણ તેનો જન્મ થાય છે. અનુભૂતિના મુખ્ય નવ રસનું સુયોજન કલાકાર પોતાની રચનામાં કરે છે. આખરે કલા માનવીના અંતરમાંથી ઊમટતાં ભાવ સંવેદનોનું દૃશ્ય રૂપ જ તો છે! દશ્યાત્મક કલાના બે પક્ષ છે. કલાકાર એટલે કે તેનો સર્જક અને દર્શક એટલે કે તેનો ભાવક. કલા આ બંને વચ્ચેનો સેતુ બને છે અને એકનું સંવેદન અનેક સુધી પહોંચે છે. કોઈ પણ લાગણી, વિચાર કે સંદેશને પ્રસારિત કરવામાં કલાનો કોઈ પ્રતિસ્પર્ધી નથી.

કલાની ચતુર્વિધ અભિવ્યક્તિ – સંગીત, નૃત્ય, અભિનય અને વિઝ્યુલ આર્ટ સ્તંભ પર નિર્માણ પામેલો પ્રકલ્પ – ‘અભિવ્યક્તિ સિટી આર્ટ.’ આ વૈવિધ્યસભર કલા ઉત્સવનું પાંચમું સંસ્કરણ અમદાવાદની ગુજરાત યુનિવર્સિટીના પ્રાંગણમાં ઊજવાઈ રહ્યું છે. સતત ચાર વર્ષથી સફળતા પૂર્વક કાર્યક્રમો કર્યા બાદ આ વર્ષે અમદાવાદ ઉપરાંત સુરત અને વડોદરા ખાતે પણ બે દિવસના કાર્યક્રમોનું આયોજન કરીને ‘અભિવ્યક્તિ’ એ તેનો વિસ્તાર વધ્યો છે. આ કાર્યક્રમોની શૃંખલા કલાકારો અને કલાપ્રેમીઓ માટે કોઈ તહેવારથી જરાય ઓછો નથી. આયોજકો બે-બે અઠવાડિયાં સુધી વિના મૂલ્યે રસિકોને કલાનાં વિવિધ વ્યંજનો પીરસે છે. તે ખરેખર અભિનંદનીય છે.