સ્થાપત્ય-વિચાર

પોન્ટે વેક્ચીઓ-ફ્લોરેન્સ ઇટલી, દુકાનો વચ્ચેનો સેતુ

- હેમંત વાળા

જ્યાં રસ્તો હોય ત્યાં દુકાનો થાય. શહેરી વિકાસનો આ એક સામાન્ય નિયમ છે. આમ તો આ નિયમ પુલને લાગુ ન પડવો જોઈએ, પરંતુ તેમ થતું નથી. ભારતના દરેક શહેરમાં પુલની પગદંડી પર ફેરિયા બેસી જાય છે અને તેઓ સારો ધંધો પણ મેળવે છે. આ કંઈ નવીન વાત નથી. ભૂતકાળમાં પણ પુલનો કેટલોક વિસ્તાર, હંગામી કે કાયમી વ્યાપારી પ્રવૃત્તિ માટે થતો જ હશે. અહી એક એવા પુલની વાત છે કે જ્યાં આશરે ૧૦૦૦ વર્ષ પહેલાં આવી સગવડતા માટેની સુયોજિત રચના કરાઈ હતી. આ એક એવો પુલ છે જેમાં બંને તરફ પહેલેથી જ દુકાનો બનાવાઈ છે અને આજની તારીખે પણ કાર્યરત છે. એકવાર તો એમ લાગે કે દુકાનોની વચ્ચેથી આર્નો નદી ૫૨ જતો માર્ગ બનાવવામાં આવ્યો છે.