તેજ-તિમિર

નૂતન કાલચક્રનો આરંભ એટલે શું?

- તરુણ દત્તાણી

અયોધ્યામાં રામ જન્મભૂમિ મંદિરમાં રામલલ્લાના બાળ સ્વરૂપની પ્રાણપ્રતિષ્ઠા વિધિ સંપન્ન થયા પછી દેશભરમાંથી આમંત્રિત વિવિધ ક્ષેત્રના મહાનુભાવો અને સંત-મહંતો, ધર્માચાર્યોને વડાપ્રધાન નરેન્દ્ર મોદી સહિત ચાર લોકોએ સંબોધન કર્યું. તમામ વક્તાઓના સંબોધનમાં એક સૂર પ્રત્યક્ષ કે પરોક્ષ રીતે સ્પષ્ટ સંભળાયો હતો કે અયોધ્યાની આ ઘટના ભારતના રાષ્ટ્રીય, સામાજિક અને સાંસ્કૃતિક જીવનમાં દૂરગામી અસર અને પ્રભાવ ઉત્પન્ન કરનારી બની રહેવાની છે.

આ સૂર અને સંદેશને સૌથી વધુ મુખર અને સ્પષ્ટ રીતે ઓજસ્વી શબ્દોમાં વડાપ્રધાન નરેન્દ્ર મોદીએ વ્યક્ત કર્યો. તેમણે આ ઘટનાને યુગાન્તકારી પરિવર્તન માટે સીમાચિહ્ન રૂપ ગણાવી એક નવા પ્રસ્થાન બિન્દુને અંકિત કરનાર તરીકે વર્ણવી. તેમણે જે શબ્દ પ્રયોગ કર્યો કે, આ પ્રાણપ્રતિષ્ઠાથી એક નવા કાલચક્રનો પ્રારંભ થવા જઈ રહ્યો છે. આ વાક્ય અત્યંત મહત્ત્વનું છે અને તેની અર્થછાયાઓ સમજવી જોઈએ. એમ કરવા જતાં તેના અનેક ગૂઢાર્થ પ્રાપ્ત થઈ શકે તેમ છે. નવા કાલચક્રને આપણે એમ પણ કહી શકીએ કે એક નવા યુગનો આરંભ થવા જઈ રહ્યો છે.