ચર્નિંગ ઘાટ

રામમંદિર પછી આપણું આગળનું કર્તવ્ય શું?

- ગૌરાંગ અમીન

કાલે શું એ છોડી આજે હમણાં અત્યારે શું કરવું એ જોઈએ

 આપણાં અર્થાત્ દેશના સારા માટે કમર કસી રોજ દોડીએ

 હવે શું? વૉટ નેક્સ્ટ? રામમંદિરની પ્રાણપ્રતિષ્ઠા પૂર્ણ થઈ ત્યારથી ધીરે-ધીરે બહુમતીનું મન એ દિશામાં આંદોલિત થવા માંડ્યું છે. એક તરફ ઢગલો મગજ એવું બોલ્યાં કે, ચૂંટણી આવી રહી છે. બીજી બાજુ સંખ્યાબંધ જીભ કહેવા લાગી કે, કાશી અને મથુરા. ત્રીજી સાઇડ એવી હતી જે વડાપ્રધાન મોદીની સૌર ઊર્જા વડે સજ્જ થવાની વાત પર દૃષ્ટિ કરતી હતી. હવે શું થશે? અને હવે શું કરવું છે? એ બંને સવાલ વચ્ચે અંતર છે. સવાલ પૂછવા અને ખરેખર ઉત્તર જાણવા વચ્ચે પણ અંતર હોઈ શકે છે. સારા સવાલના ઉત્તર જાણ્યા પછી તેને આવકારી તેના પર કામ કરવા માટે આતુર હોય એવા સુજનને વંદન. હક્ક અને ફરજ કોના હોય છે? પોતાના. બંધારણનું પ્રારંભ આમુખથી થાય છે અને તેમાં પ્રથમ શબ્દ છે વી એટલે કે આપણે. બંધારણ અને શાસ્ત્ર ‘હવે તમારે શું કરવું જોઈએ?’ તેના પર ભાર મૂકે છે. બીજું કોઈ શું કરશે? અને આપણાંથી શું થઈ શકે તેવું છે? એવું બધું જોવું જોઈએ તેની ના નથી, છતાં આપણે શું ના કરવું જોઈએ તેની ના આપણે સમજવાની છે અને આપણે શું કરવુંજોઈએ તેની હા આપણે સમજવાની છે.

જીવન એક વાર્તા છે એવા શબ્દો સાહિત્યિક હોય ત્યાં સુધી સારા અને સાચા લાગે. વાસ્તવિક સંસારમાં જીવન સાચું જ લાગે છે.બાળકને વાર્તા કહેવામાં આવે ત્યારે એ ‘પછી શું થયું?’ એમ પૂછે તો વાર્તા કહેનારનો ઉત્સાહ અને આનંદ વધે. મિસ્ટર નટવરલાલ ફિલ્મમાં ‘ફિર ક્યા હુઆ?’ પ્રશ્ન પૂછતું બાળક સૌને મીઠું અને નિર્દોષ લાગે છે.વેલી, સ્ટોરી જુદી અને ઇતિહાસ જુદો. ઇતિહાસને વાર્તા ગણનારાએ હવે તો જાગવું જ જોઈએ. પાંચસો વર્ષ પછી રામમંદિર બન્યું, કારણ કે સુપ્રીમ કોર્ટમાં પુરાતત્ત્વીય અને દસ્તાવેજી પુરાવા થકી એવું સાબિત થયું કે ત્યાં મંદિર હતું જ. ઇતિહાસ થોડો ઘણો બચ્યો હતો એટલે કામમાં લાગ્યો. નવા રામમંદિરના પુરાવા અંગેના વિવિધ ભાષામાં ઇન્સ્ક્રિપ્શન કરેલા પથ્થર રામમંદિરની ધરામાં યોગ્ય રીતે ગોઠવવામાં આવ્યા છે કે નહીં, તે અંગે કોઈ વાત નથી કરતું. બહુમતી એવા મૂડમાં મહાલે છે કે હવે તો ક્યારેય કશું બદલાશે જ નહીં.