કેમિલી ઝોન ફેશન

ફોર્મલ કે ટ્રેડિશનલ વેર, બ્લોક પ્રિન્ટની ફેશન હોટફેવરિટ છે

- હેતલ ભટ્ટ

લગ્ન સિઝન શરૂ થતાંની સાથે જ સાડીઓની સિઝન પણ શરૂ થાય છે, એમ કહી શકાય. જુદી-જુદી પ્રિન્ટ, ડિઝાઇનની સાડીઓ પહેરીને મહિલાઓને અન્યો કરતાં અલગ દેખાવવાનું-સુંદર દેખાવવાનું સ્વાભાવિક રીતે ગમતું હોય છે. આમ તો સાડીની કોઈ સિઝન ન હોય, બારેમાસ કોઈ પણ પ્રસંગે અને કોઈ પણ દિવસે પહેરી શકાય એવું પરિધાન છે. જોકે હવે સાડીઓમાં જે ટ્રેન્ડ ચાલી રહ્યો છે તેમાં બાટિક, અજરખ, બાંધણી, લહેરિયું, કલમકારી, બ્લોક પ્રિન્ટ જેવી સાડીઓ માનુનીઓની ફેવરિટ બની રહી છે. તેનું એક કારણ એ છે કે આ સાડીઓ કોઈ પણ પ્રસંગે પહેરી શકાય છે. ફોર્મલ વેર હોય, કેઝ્યુઅલ વેર હોય કે ટ્રેડિશનલ વેર તરીકે સાડી પહેરવાની હોય, આ બધી સાડીઓ દરેક જગ્યાએ સુટ થઈ જાય છે. તેથી જ હવે મહિલાઓ આ જુદી-જુદી પેટર્ન અને ડિઝાઇન તેમ જ ટેક્સચરની સાડીઓના ક્લેક્શનને પ્રાધાન્ય આપતી થઈ છે.