બજેટ બાબુને લોન લી બનાવે છે!

આ અઠવાડિયે બીજી લોન મારે લેવી પડી.

- હર્ષદ પંડ્યા ‘ શબ્દપ્રીત’

બજેટની લીલા ન્યારી છે. ફૂટપાથ પર બેસીને આરામથી ભીખ માગતો ભિક્ષુક પણ તેના બિરાદરી ભિક્ષુક સાથે બજેટનું સંશયાત્મક વિશ્લેષણ કરતો હોય છેઃ ‘જોયું, આપણા શ્રમનો, આપણી મહેનતનો અને આપણી મજૂરીનો ઉત્તરોત્તર વિકાસ થતો રહે એ વાતને ધ્યાનમાં રાખીને સરકારે આ બજેટમાં પણ આપણા જેવા સ્વપ્નસેવી - સ્વપ્નજીવી માણસો માટે કોઈ જ બેનિફિટ સૂચવ્યો નથી. નથી તો આપણી ભિક્ષાવૃત્તિને પ્રોત્સાહન આપતી રાહતો સૂચવી કે નથી તો આપણી ભિક્ષાપ્રવૃત્તિને કોઈ સબસડી સૂચવી. સાચું કહું? ગયા અઠવાડિયે જ મેં જૂની લોન પૂરી કરી અને આ અઠવાડિયે બીજી લોન મારે લેવી પડી.’ તરત જ પહેલા ભિક્ષુકે કહ્યું, ‘એ તો સારું જ કહેવાય ને! બજેટ આપણને લોન લેતા ન કરી દેતું હોત તો આપણે કામચોર બનીને આળસુ થઈ ગયા હોત અને બૅન્કોમાં પૈસા સડી ગયા હોત! એમ કહે કે, બજેટ આપણને ઊંઘવા દેતું નથી એટલે આપણે જાગતા રહીને કામ કરતા રહીએ છીએ!

બજેટની રચનાત્મક અસરો જોતાં એવું લાગે છે કે સરકારે બૅન્ક કૌભાડિયાઓને પકડવાને બદલે એમના ગોડફાધર ગણાતા ચાર્વાક ઋષિને જ પકડીને જેલ ભેગા કરી દેવા જોઈએ. ચાર્વાક મુનિએ જ શીખવાડ્યું છે ને કે ‘દેવું કરીને પણ ઘી પીવું!’ જોકે ચાર્વાક મુનિને એ વખતે એવો તો ખ્યાલ જ નહીં હોય કે બૅન્કના વહીવટદારો ‘દેવું’નો અર્થ લોન કરશે?

અમારો બાબુ બૉસ છેલ્લા કેટલાય સમયથી ‘લોનલી’ થઈને જીવે છે. ‘લોનલી’ એટલે એકલવાયો નહીં, પણ જાત-જાતની લોન લઈને એણે એની વાઇફને ‘લોનલી’ બનાવી દીધી છે. એ તો સારું છે કે એણે પોતાની ‘બૉસ’ અટકને બદલીને ‘બ્રુસ લી’ની જેમ ‘લોન લી’ અટક નથી કરી! બાકી, બાબુને લોન માટે પુરો પ્રેમ!

હજુ તો ગયા જાન્યુઆરીમાં જ બાબુના ઘેર દીકરીનો જન્મ થયો. નામ તો એણે રાશિ પ્રમાણે જ પાડ્યું છે, પણ બાબુનો લોનપ્રેમ એ નામમાં દેખાવા લાગ્યો. વાત જાણે એમ બની કે બેબીની રાશિ આવી વૃષભ. બાબુએ પ્રેમથી એનું નામ (બ, વ, ઉ, પરથી) ‘બેબીલોન’ પાડ્યું! પહેલાં તો મને થયું કે બાબુને ઐતિહાસિક સંસ્કૃતિ માટે કેટલો બધો પ્રેમ છે, પણ પછી ખબર પડી કે મૅટરનિટી હૉસ્પિટલમાંથી વાઇફ અને બેબી બંનેનું પઝેશન લેવા એણે લોન ઉપાડીને હૉસ્પિટલમાં પૈસા ભરેલા!