મહિલા દિવસની ઉજવણીમાં શું યુદ્ધ પીડિતાઓ ના અવાજને સાંભળવામાં આવશે?

મહિલાઓનાં સંઘર્ષ અને સિદ્ધિઓને બિરદાવતા અનેક કાર્યક્રમો યોજાય છે.

- બેલા ઠાકર

માર્ચ મહિનો આવતાં જ દુનિયાભરમાં આંતરરાષ્ટ્રીય મહિલા દિવસ (૮ માર્ચ) અને આંતરરાષ્ટ્રીય મહિલા સપ્તાહની ઉજવણીની તૈયારીઓ શરૂ થઈ જાય છે. મહિલાઓનાં સંઘર્ષ અને સિદ્ધિઓને બિરદાવતા અનેક કાર્યક્રમો યોજાય છે. એક સ્ત્રી હોવાને નાતે દર વર્ષે હું પણ હરખભેર આવા કાર્યક્રમોમાં ભાગ લઉં છું, પરંતુ આ વર્ષે આવો હરખ નથી થતો. ટીવીના પડદા પર ઇઝરાયલ - હમાસ વચ્ચે ચાલી રહેલા યુદ્ધનાં દશ્યોને નિહાળું છું. ઇઝરાયલે ગાઝાપટ્ટી પર કરેલા વિનાશક હુમલાઓમાં તબાહ થઈ ગયેલાં મકાનો અને ઇન્સાનો મનને વિચલિત કરી દે છે. નાગરિકો પર લગાતાર વરસી રહેલી મિસાઇલોથી ઘાયલ એક મહિલા ત્રણેક વર્ષના પોતાના મૃ ત બાળકને બે હાથમાં ઉઠાવીને કલ્પાંત કરી રહી છે. હું ટીવીની સ્વીચ ઑફ કરી દઉં છું, પરંતુ તેથી કંઈ યુદ્ધ અટકવાનું નથી, પેલી સ્ત્રી જેવી અનેક સ્ત્રીઓનું કલ્પાંત બંધ થવાનું નથી. રશિયા-યુક્રેન વચ્ચે બે વર્ષથી ચાલી રહેલું યુદ્ધ સમાપ્ત થવાનું નામ લેતું નથી.

યુદ્ધમેદાનમાં પલટાઈ રહેલી દુનિયામાં આપણે આંતરરાષ્ટ્રીય મહિલા દિવસની ઉજવણી કરીશું. મહિલાઓના અધિકારીઓના ક્ષેત્રે દુનિયામાં ઘણી સારી પ્રગતિ થઈ છે, તે વાતની ના નથી, પરંતુ યુદ્ધના અત્યાચારોનો ભોગ બનતી હજારો, લાખો સ્ત્રીઓનું શું? તેમના વિશે તો કોઈ અવાજ જ નથી ઉઠાવતું! જાણે કે આવું કશું બનતું જ નથી. ખુદ સરકારો અને નેતાઓ પણ આ બાબતે ભયંકર ચુપકીદી સેવે છે.

મારા હાથમાં જાણીતાં બ્રિટિશ મહિલા વૉર રિપોર્ટર અને લેખિકા ક્રિસ્ટિના લેમ્બનું પુસ્તક છે. પુસ્તકનું શીર્ષક છેઃ ‘Our Bodies, Their Battlefield What war Does to Women.' ક્રિસ્ટિનાએ એશિયા, આફ્રિકા, યુરોપ અને સાઉથ અમેરિકા એમ ચાર ખંડોમાં ફરીને યુદ્ધપીડિતા સ્ત્રીઓની મુલાકાત લીધી છે. તેમણે વેઠેલી યાતના અને અત્યાચારોનો ફર્સ્ટ હેન્ડ રિપોર્ટ આપ્યો છે. આ પુસ્તકમાં તેમણે યુદ્ધ, આતંકવાદી હુમલા અને બળવાઓ દરમિયાન સ્ત્રીઓનાં શરીર, મન અને આત્મા ઉપર કેવા ઊંડા જખ્મો અને ઉઝરડા થાય છે તેનો તાદશ ચિતાર આપ્યો છે.