விழுப்புரம், கடலூர், கள்ளக்குறிச்சி, திருவண்ணாமலை மாவட்டங்களில் பெஞ்சல் புயல் வெள்ளத்தால் 26 பேர் பலி

பெஞ்சல் புயல் சூறையாடிய விழுப்புரம், கடலூர், கள்ளக்குறிச்சி, திருவண்ணாமலை மாவட்டங்களில் வெள்ள பாதிப்புகளில் 26 பேர் உயிரிழந்துள்ளனர்.

மொத்தம் ரூ.1,500 கோடிக்கு வர்த்தகம் பாதித்துள்ளது. பெஞ்சல் புயல் கடந்த 30ம்தேதி இரவு கரையை கடந்தது. அப்போது பெய்த பேய் மழையால் விழுப்புரம், கடலூர், கள்ளக்குறிச்சி உள்ளிட்ட வடமாவட்டங்கள் கடும் பாதிப்புகளை சந்தித்துள்ளன.

விழுப்புரம் மாவட்டம்: விழுப்புரம் மாவட்டத்தில் 250க்கும் மேற்பட்ட வீடுகள் சேதமடைந்துள்ளது. 13 ஆயிரம் ெஹக்டேர் நெல், சிறுதானிய பயிர்கள், வாழை சேதமடைந்துள்ளது. இதுதவிர சுமார் 60 ஆயிரம் ஏக்கர் சவுக்குதோப்பு பாதிக்கப்பட்டுள்ளது. விழுப்புரம் நகரில் 8 ஆயிரம் வீடுகளையும், மாவட்டம் முழுவதும் 35 ஆயிரம் வீடுகளையும் வெள்ளம் சூழ்ந்துள்ளது. 2 வாலிபர் உள்பட 12 பேர் உயிரிழந்துள்ளனர். 97 கால்நடைகள், கன்றுகளும், 56 வாத்துகள் மற்றும் கோழிகள் வெள்ளத்தில் சிக்கி உயிரிழந்தன.

10 ஆயிரம் பொதுமக்கள் நிவாரண முகாம்களில் தங்கி உள்ளனர். ரூ.850 கோடிக்கு வர்த்தகம் முடங்கியுள்ளது. இதேபோல் கட்டுமானம், வேளாண்மை சார்ந்த தொழிலில் ஈடுபட்ட 1.5 லட்சம் பேர் வீட்டில் முடங்கி உள்ளனர். 3 ஆயிரம் மீனவர்களின் குடும்பங்களின் வாழ்வாதாரமும் பாதிக்கப்பட்டது. கடலூர் மாவட்டம்: கடலூர் மாவட்டத்தில் 80 ஆயிரம் ஹெக்டேர் வேளாண், தோட்டக்கலை பயிர்களை வெள்ளம் சூழ்ந்துள்ளது. குடிசை, ஓடு வீடுகள் உள்பட மொத்தம் 350 வீடுகள் சேதமடைந்துள்ளன 3 பேர் பலியாகி உள்ளனர்.

மாவட்டம் முழுவதும் 40 ஆயிரம் பேர் தொடர்ந்து 5வது நாளாக நிவாரண முகாம்களில் தங்க வைக்கப்பட்டுள்ளனர். ரூ.500 கோடிக்குமேல் வர்த்தகம் பாதிக்கப்பட்டுள்ளது. கள்ளக்குறிச்சி மாவட்டம்: கள்ளக்குறிச்சி மாவட்டத்தில் 164 குடிசை மற்றும் ஓடு வீடுகள் சேதமடைந்துள்ளன. ஒருவர் உயிரிழந்துள்ளார். 39 ஆடு, மாடுகள் சேதமடைந்துள்ளன. திருக்கோவிலூர், சங்கராபுரம், கள்ளக்குறிச்சி டவுன் உள்ளிட்ட பகுதியில் சுமார் 1,000க்கும் மேற்பட்ட வீடுகளை வெள்ளம் சூழந்துள்ளது.