நாடாளுமன்ற வளாகத்தில் மோதல் பாஜ - காங். எம்.பிக்கள் கைகலப்பு

நாடாளுமன்ற வளாகத்தில் அமித்ஷாவை கண்டித்து நடந்த போராட்டத்தை தொடர்ந்து, அவைக்குள் காங்கிரஸ் எம்.பிக்கள் நுழைய முயன்றபோது, பாஜ எம்.பி.க்கள் தடுக்க முயன்றதால் மோதல் ஏற்பட்டது.

இரு கட்சி எம்பிக்களும் கைகலப்பில் ஈடுபட்டனர். இதில், மல்லிகார்ஜுன கார்கே, ராகுல் காந்தியை பாஜ எம்.பி.க்கள் தள்ளிவிட்டதாக காங்கிரஸ் குற்றம்சாட்டியது. அதே நேரத்தில், ராகுல் காந்தி தள்ளிவிட்டதில் தாங்கள் காயமடைந்ததாக கூறி பாஜ எம்பிக்கள் 2 பேர் மருத்துவமனையில் அனுமதிக்கப்பட்டுள்ளனர். இதுதொடர்பாக ராகுல் காந்தி மீது போலீசார் வழக்கு பதிவு செய்துள்ளனர்.

நாடாளுமன்ற குளிர்கால கூட்டத் தொடரில், அரசியலமைப்பின் 75ம் ஆண்டு நிறைவு விழா சிறப்பு விவாதத்தில் பேசிய ஒன்றிய உள்துறை அமைச்சர் அமித்ஷா, அம்பேத்கரை அவமதித்ததாக காங்கிரஸ் உள்ளிட்ட எதிர்க்கட்சிகள் கடும் கண்டனம் தெரிவித்துள்ளன. இதற்காக அமித்ஷா மன்னிப்பு கேட்க வேண்டும், அவர் பதவி விலக வேண்டுமென நாடு முழுவதும் போராட்டங்கள் நடந்து வருகின்றன. இந்த குற்றச்சாட்டை பிரதமர் மோடி, அமித்ஷா உள்ளிட்ட பாஜ தலைவர்கள் மறுத்து, காங்கிரஸ் உண்மையை திரித்துக் கூறுவதாக குற்றம்சாட்டி உள்ளனர்.

இந்நிலையில், நாடாளுமன்றம் நேற்று கூடுவதற்கு முன்பாக ராகுல், பிரியங்கா காந்தி தலைமையில் இந்தியா கூட்டணி கட்சி எம்பிக்கள் அமித்ஷாவை கண்டித்து போராட்டம் நடத்தினர்.

அப்போது அவர்கள் நாடாளுமன்ற வளாகத்தில் உள்ள அம்பேத்கர் சிலையில் இருந்து மகர் துவார் எனப்படும் நாடாளுமன்ற நுழைவாயில் வரை பேரணி நடத்தினர்.

இதில் பல எதிர்க்கட்சி எம்பிக்களும் நீல நிற உடையில் பங்கேற்றனர். அதே சமயம், காங்கிரசை கண்டித்து பாஜ எம்பிக்கள் மகர் துவார் படிக்கட்டுகளில் போராட்டம் நடத்திக் கொண்டிருந்தனர்.

இதனால், பாஜ, காங்கிரஸ் எம்பிக்கள் நேருக்கு நேராக சந்தித்த நிலையில், காங்கிரஸ் எம்பிக்கள் படிக்கட்டில் ஏறி கூட்டத்தொடரில் பங்கேற்க அவைக்கு செல்ல முயன்றனர். ஆனால் அவர்களுக்கு வழிவிடாமல் பாஜ எம்பிக்கள் தடுத்ததால் இரு தரப்பிலும் தள்ளுமுள்ளு ஏற்பட்டது. இரு கட்சி எம்பிக்களும் கைகலப்பில் ஈடுபட்டதாக கூறப்படுகிறது.

அப்போது, மாநிலங்களவை எதிர்க்கட்சித் தலைவரும் காங்கிரஸ் தலைவருமான மல்லிகார்ஜுன கார்கே பாஜ எம்.பி.க்களால் தள்ளிவிடப்பட்டார். படிக்கட்டில் சாய்ந்த அவர் சுதாரித்து எழுந்தார். அதே நேரத்தில் ராகுல் காந்தி உள்ளிட்ட காங்கிரஸ் எம்பிக்களை பாஜ எம்பிக்கள் தள்ளிவிட்டதாக கூறப்படுகிறது. இதனால் நாடாளுமன்ற வளாகத்தில் வரலாறு காணாத சம்பவங்கள் அரங்கேறின.