சென்னையில் வடகிழக்கு பருவமழை காரணமாக மழைநீருடன் கழிவுநீர் கலந்து தேங்குவதாக 17,235 புகார்கள்

கூடுதல் சுத்திகரிப்பு நிலையம் அமைக்க கோரிக்கை

வடகிழக்கு பருவமழை காரணமாக சென்னையில் மழைநீருடன் கழிவுநீர் கலப்பதாக 17,235 புகார்கள் பெற்றப்பட்டுள்ளன. இதற்கு தீர்வுகாண கழிவுநீர் சுத்திகரிப்பு நிலையம் அமைக்க கவுன்சிலர்கள் கோரிக்கை வைத்துள்ளனர்.

தமிழகத்தில் வடகிழக்கு பருவமழை கடந்த அக்டோபர் 1ம் தேதி முதல் தொடங்கி, பரவலாக கன மழை பெய்து வருகிறது. இதனால், சென்னை உள்பட வட தமிழக மாவட்டங்களில் வெள்ளம் சூழ்ந்தது. வடகிழக்கு பருவமழை இயல்பை விட 34 சதவீதம் அதிகமாக பெய்தது முக்கிய காரணமாக ஆகும். சென்னையை பொறுத்தவரை இயல்பை விட மொத்தம் 25 சதவீதம் வரை மழை அதிகரித்துள்ளது.

வடகிழக்கு பருவ மழையை முன்னிட்டு, சென்னை மாநகராட்சி சார்பில் பல்வேறு முன்னெச்சரிக்கை நடவடிக்கைகள் எடுக்கப்பட்டன. குறிப்பாக, மாநகராட்சியால் பராமரிக்கப்படும் 33 கால்வாய்களில் 53.42 கி.மீ. நீளத்திற்கு தூர்வாரும் பணிகள் மேற்கொள்ளப்பட்டு, ஆகாயத்தாமரைகள் அகற்றப்பட்டன.

நீர்வளத்துறை பராமரிப்பில் உள்ள 15 கால்வாய்களில் 107.06 கி.மீ. நீளத்திற்கு தூர்வாருதல் மற்றும் ஆகாயத்தாமரைகள் அகற்றும் பணிகள் மேற்கொள்ளப்பட்டன.

மாநகராட்சி பராமரிப்பில் உள்ள 16 சுரங்கப்பாதைகள் மற்றும் நெடுஞ்சாலைத்துறை பராமரிப்பில் உள்ள 6 சுரங்கப்பாதைகள் என மொத்தம் 22 சுரங்கப்பாதைகளில் தானியங்கி கண்காணிப்பு கேமராக்கள் பொருத்தப்பட்டு, நீர்த்தேக்கம் கண்காணிக்கப்பட்டது.