நெரிசலில் சிக்கி தாமதமாவதை தடுக்கும் வகையில் மாநகர பேருந்துகளுக்கு சிக்னலில் முன்னுரிமை

நெரிசலில் சிக்கி தாமதமாவதை தடுக்கும் வகையில், மாநகர பேருந்துகளுக்கு சிக்னல்களில் முன்னுரிமை அளிக்க திட்டமிடப்பட்டுள்ளது.

இதற்காக, ஆலந்தூர் முதல் விமான நிலையம் வரை ஜிஎஸ்டி சாலையில் சோதனை ஓட்டம் நடத்தப்படும் என மாநகர போக்குவரத்து கழக அதிகாரிகள் தெரிவித்துள்ளனர். சென்னையில் புறநகர் மின்சார ரயில், மெட்ரோ ரயில் ஆகியவை இயக்கப்பட்டாலும், அனைத்து இடங்களுக்கும் மாநகர பேருந்துகள் இயக்கப்படுவதால், மக்கள் பேருந்து போக்குவரத்தை அதிகளவில் நாடியுள்ளனர்.

சென்னை மாநகர போக்குவரத்து கழகம் சார்பில், 659 வழித்தடங்களில் 3,436 பேருந்துகள் தினமும் இயக்கப்படுகின்றன. 32 பணிமனைகளில் இருந்து இயக்கப்படும் பேருந்துகளில் தினமும் 33.60 லட்சம் பேர் பயணம் செய்து வருகின்றனர். இந்நிலையில், மாநகர பேருந்துகள் நெரிசலில் சிக்கி தாமதமாவதை தடுக்கும் வகையிலும், பேருந்து பயணத்தை மேம்படுத்தும் நோக்கிலும் சிக்னல்களில் மாநகர பேருந்துகளுக்கு முன்னுரிமை அளிக்கும் புதிய திட்டத்தை மாநகர போக்குவரத்து கழகம் செயல்படுத்த உள்ளது.