ഭൂലോക വൈകുണ്ഠ ദർശനം

ആറാട്ടുപുഴ പൂരം

- ബാബുരാജ് പൊറത്തിശ്ശേരി 9846025010

ചരിത്രപ്രസിദ്ധമായ ആറാട്ടുപുഴ പൂരം ഈ വർഷം മീനം 10(മാർച്ച് 23)നാണ് ലോകത്തിലെ തന്നെ ഏറ്റവും വലിയ ദേവമേളയായ ആറാട്ടുപുഴ പൂരം, ആറാട്ടുപുഴ ശാസ്താക്ഷേത്രത്തിന് മുൻവശത്തുള്ള വിശാലമായ പാടത്താണ് ആഘോഷിക്കുന്നത്. പ്രതിഷ്ഠാശക്തിയും സങ്കൽപ്പശക്തിയും സമ്മേളിക്കുന്ന രൗദ്രമൂർത്തിയായി വില്ലേന്തി നിൽക്കുന്ന ശാസ്താവ് ശാന്ത മൂർത്തിയായി പ്രജാപാലകനായി വാഴുന്നു.

ഒരു ക്ഷേത്രത്തെ സംബന്ധിച്ച് വളരെ പ്രാധാന്യമേറിയ സംഗതി ഉത്സവമാണ്. ക്ഷേത്രങ്ങളിൽ താന്ത്രിക വിധി പ്രകാരമാണ് ഉത്സവം നടത്തുക. ശബരിമല, ഗുരുവായൂർ, ഏറ്റുമാനൂർ, കൂടൽമാണി ക്യം തുടങ്ങിയ ക്ഷേത്രങ്ങളിലെ ആണ്ടറുതി ആഘോഷങ്ങൾക്ക് ഉത്സവം എന്നും ഉത്രാളിക്കാവ്, ചിനക്കത്തൂർ, മണ്ണാർക്കാട്, കാട്ടകാമ്പാൽ തുടങ്ങിയ ഭഗവതി ക്ഷേത്രങ്ങളിൽ പൂരവും, കൊടുങ്ങല്ലൂർ, പറക്കൊട്ടുകാവ്, അച്ചങ്കാവ് തുടങ്ങിയ ഭവതി ക്ഷേത്രങ്ങളിൽ താലപ്പൊലിയും, നെന്മാറ വല്ലങ്ങി വേലയും, കുനിശ്ശേരി കുമ്മാട്ടി വേലയും, തിരുവമ്പാടി- പാറമേക്കാവ് ദേവസ്വങ്ങൾ സംയുക്തമായി അന്വേഷിച്ച് വരുന്ന തൃശൂർ പൂരവും ഒക്കെ ഉത്സവ പൂരാഘോഷങ്ങളാണ്. ശാസ്താക്കന്മാരുടെ പൂരമാണ് ആറാട്ടുപുഴ പൂരം. വ്യത്യസ്ത പേരുകളിലാണെങ്കിലും സന്തോഷമുളവാക്കുന്ന കവിഞ്ഞൊഴുകലാണ് ഓരോ ദേവസങ്കേതത്തിലും ഉണ്ടാകുന്നത്‌. 

ദേവസന്നിധിയിലെത്തുന്ന പുണ്യം സന്തോഷരൂപത്തിൽ ആ സങ്കേതത്തിൽ മുഴുവൻ വിലയിക്കുന്നതായി കാണാം. ക്ഷേത്രത്തിൽ ഒതുങ്ങി നിന്നിരുന്ന ചൈതന്യം ദേവൻ പുറത്തേയ്ക്കെഴുന്നെള്ളുമ്പോൾ ആ പ്രദേശമാകെ പ്രസരിക്കുന്നു. ചൈതന്യപൂരിതമായ അന്തരീക്ഷത്തിൽ ഐശ്വര്യസംവർദ്ധകമായ പല കർമ്മങ്ങളും നിർവ്വഹിക്കാറുണ്ട്. വ്രതശുദ്ധിയുടെ നിറവിൽ നിർവ്വഹിക്കുന്ന കർമ്മങ്ങൾ എല്ലാം തന്നെ ആചാര്യപ്രോക്തങ്ങളാണ്.

പെരുവനം ഗ്രാമം