നേർത്ത സൂചിയാൽ വേദന തൊട്ടുമാറ്റും സിസ്റ്റർ ഡോക്ടർ

സംശുദ്ധമായ സസ്യജന്യമരുന്നുകൂട്ടുകൾ ആണ് ഇലക്ട്രോ ഹോമിയോപ്പതിയിൽ ഉപയോഗിക്കുന്നത്

- മൈക്കിൾ വർഗീസ് ചെങ്ങാടക്കരി

തലമുടിയിഴയേക്കാൾ നേർത്ത സൂചികൾ ശരീരത്തിൽ തൊട്ടിറക്കിയുള്ള "അക്യുപങ്ചർ' ചികിത്സയിലൂടെ ആയിരക്കണക്കിന് പേരുടെ മാറാരോഗങ്ങൾ മാറ്റിയതിന്റെ ആനന്ദവും അഭിമാനവുമായി സിസ്റ്റർ(ഡോക്ടർ)ഫിലമിൻ മാത്യു. അരൂക്കുറ്റി പാണാവള്ളിയിലെ അസീസി ആശുപത്രിയിൽ "സിസ്റ്റർ ഡോക്ടറുടെ' കൈപ്പുണ്യം തേടി പല രോഗികളും എത്തുന്നു.

ചൈനയിൽ നിന്നുൾപ്പെടെ ബദൽ ചികിത്സാ ശാസ്ത്ര വിധികളിൽ വിദഗ്ധ പഠനവും പരിശീലനവും നേടിയിട്ടുള്ള സിസ്റ്റർ ഫിലമിന് അക്യുപങ്ചറിനു പുറമേ ഇലക്ട്രോ ഹോമിയോപ്പതി ഉൾപ്പെടെയുള്ള ചികിത്സാ ശാഖകളിലും നൈപുണ്യമുണ്ട്. സംശുദ്ധമായ സസ്യജന്യമരുന്നുകൂട്ടുകൾ ആണ് ഇലക്ട്രോ ഹോമിയോപ്പതിയിൽ ഉപയോഗിക്കുന്നത്. സുജോക് തെറാപ്പി, കപ്പിങ്, ഓറിക്കുലർ തെറാപ്പ ബീഡ് തെറാപ്പി തുടങ്ങിയവയും സിസ്റ്ററിനു സ്വായത്തം. ശരീരത്തിനുണ്ടാകുന്ന ഏത് അസുഖങ്ങളെയും സൂക്ഷ്മമായി വിലയിരുത്തിയ ശേഷം അനുയോജ്യമായ ചികിത്സാവിധി നിർദേശിക്കുന്നതാണ് സിസ്റ്റർ സ്വായത്തമാക്കിയിട്ടുള്ള ശൈലി.

ആത്മവിശ്വാസത്തോടെ സിസ്റ്റർ ഫിലമിൻ പറയുന്നു: "ഈ ചികിത്സവഴി രോഗശാന്തി കിട്ടിയ ഒട്ടേറെപ്പേർ ദിനംതോറും വിളിക്കുന്നുണ്ട്. അവരുടെ വാക്കുകളിൽനിന്ന് പകർന്നുകിട്ടുന്ന സന്തോഷം എനിക്ക് പുതിയ ഊർജ്ജം നൽകുന്നു. വലിയ ദൈവാനുഗ്രഹമാണ് ഇതിനുപിന്നിൽ. ഈ ദൈവികശക്തി എപ്പോഴും എന്നോടൊപ്പം ഉണ്ടാകും. പരസഹായമില്ലാതെ ഒന്നും ചെയ്യാൻ കഴിയാതിരുന്നവരാണ് സിസ്റ്ററിന്റെ ചികിത്സവഴി സുഗമജീവിതം തിരികെ പിടിച്ചവരിൽ ഭൂരിഭാഗം പേരും.

ചൈനയുടെ വിളി

ലാബ് ടെക്നീഷ്യൻ കോഴ്സ് പഠിച്ചശേഷം ആതുരസേവന മേഖലയിൽ പുതിയ കർമ്മ സരണികൾ തേടിപ്പോയ അസാധാരണ ജീവിതമാണ് കർമ്മലീത്താ സന്യാസ സമൂഹാംഗമായ സിസ്റ്റർ ഫിലമിന്റേത്. ലഖ്നൗവിലെ ശാന്തിനഗർ ആശുപത്രിയിൽ സേവനം ആരംഭിച്ചതോടെയാണ് അക്യുപങ്ചർ ചികിത്സയുടെ അത്ഭുതങ്ങൾ ഈ കുമ്പളങ്ങിക്കാരി ആദ്യമായി നേരിട്ട് കണ്ടത്. തുടർന്ന് ബംഗാൾ യൂണിവേഴ്സിറ്റിയിൽനിന്ന് വൈദഗ്ധ്യം നേടി; ചൈനയിലും ഉപരിപഠനം നടത്തി. ഡൽഹിയിലെ എൻ.ഇ.എച്ച്.എം ഓഫ് ഇന്ത്യയിൽ ആയിരുന്നു ഇലക്ട്രോ ഹോമിയോപ്പതിയിൽ ഉന്നതപഠനം.

മുൻവിധിയരുത്