സ്നേഹപൂർവം, പെലെ

കുട്ടിക്കാല ഓർമകളിലേക്ക് പെലെ വരികളിലൂടെ തിരികെ നടക്കുന്നു. 76-ാം വയസ്സിൽ പെലെ, ബാലനായ പെലെയ്ക്ക് എഴുതിയ കത്ത്. പ്ലയേഴ്സ് ട്രിബ്യൂണിൽ പ്രസിദ്ധീകരിച്ച കത്തിന്റെ മലയാള പരിഭാഷ....

പ്രിയപ്പെട്ട ഡിക്കോ... (നിന്റെ വീട്ടുകാർക്ക് അങ്ങനെ വിളിക്കുന്നതാണ് ഇഷ്ടം ഞാൻ പറയുന്നത് നീ വളരെ ശ്രദ്ധയോടെ കേൾക്കണം. അഞ്ച് വയസ്സ് മാത്രമാണ് നിന്റെ പ്രായം. കുട്ടിയാണ്. പലതും മറക്കാൻ സാധ്യതയുണ്ട്. ട്രെസ് കൊറാക്കോസിൽ നിന്ന് നിന്റെ കുടുംബം മാറിപ്പാർക്കുമ്പോൾ നീ അമ്മയുടെ സോക്സ് എടുക്കാൻ മറക്കരുത്. എങ്ങാനും മറന്നാൽ, അത് നിന്റെ ജീവിതത്തെ മാറ്റിമറിക്കും.

ഇപ്പോൾ നിന്റെ അച്ഛൻ ബൗറു അത്ലറ്റിക്കോയ്ക്ക് വേണ്ടിയാണ് കളിക്കുന്നത്. അച്ഛന്റെ സൗകര്യത്തിനായി കുടുംബം ബൗറുവിലേക്ക് മാറും. അവിടെ നിന്നെ കാത്തിരിക്കുന്നത് വളരെ ചെറിയ വീടായിരിക്കും. ആ വീട്ടിൽ നീയും സഹോദരനും ഒരേ കട്ടിലിൽ കിടക്കേണ്ടി വരും. അത് എപ്പോഴും ആശ്വാസകരവും സുഖകരവുമല്ല. എന്നാൽ, ഒപ്പം കിടക്കുന്നു എന്ന ഒറ്റക്കാരണത്താൽ സഹോദരനായിരിക്കും നിന്റെ ബെസ്റ്റ് ഫ്രണ്ട്.

ബൗറുവിലെ വീടിന് മുമ്പിൽ നീ പുൽമേടുകൾ പ്രതീക്ഷിക്കരുത്. ചെളിയും തരിമണലുമായിരിക്കും അവിടെ നിന്നെ കാത്തിരിക്കുക. അതാണ് നിന്റെ ആദ്യത്തെ ഫുട്ബോൾ മൈതാനം. ഒരിക്കൽ ഇതിലും മികച്ചതും വലുതുമായ മൈതാനത്ത് നീ കളിക്കും. അതിനെപ്പറ്റി ഞാൻ പിന്നീട് പറയാം. ഇപ്പോൾ ഈ ചെളിയും മണലുമാണ് നിന്റെ മൈതാനം. മുളകളും കമ്പുകളും മൂർച്ചയേറിയ കത്തികളും ഉപയോഗിച്ച് നീയും നിന്റെ കൂട്ടുകാരും അവിടെ ഗോൾ പോസ്റ്റുകൾ സ്ഥാപിക്കേണ്ടി വരും. മറ്റാരും അതിന് നിങ്ങളെ സഹായിച്ചേക്കില്ല.

ശരിക്കുമുള്ള ഫുട്ബോൾ വാങ്ങാനുള്ള പണം നിങ്ങളുടെ കൈയിൽ ഇല്ലെന്നതാണ് മറ്റൊരു കാര്യം. അതുകൊണ്ടാണ് അമ്മയുടെ സോക്സ്‌  എടുക്കാൻ മറക്കരുതെന്ന് നേരത്തേ പറഞ്ഞത്. ആ സോക്സിനുള്ളിൽ പഴയ പേപ്പറുകൾ ചുരുട്ടിക്കെട്ടിയാണ് നീ പന്തുണ്ടാക്കേണ്ടത്. ആ പന്തിന് ഒരിക്കലും ഫുട്ബോളിന്റെ ഉരുളൻ രൂപമുണ്ടാകില്ല. പക്ഷേ, നിനക്കും കൂട്ടുകാർക്കും ആ പന്ത് ധാരാളമാണ്. നിങ്ങൾ മണിക്കൂറോളം ആ പന്ത് തട്ടിക്കളിക്കും. ബൂട്ട് വാങ്ങാനുള്ള പണമൊന്നും നിന്റെ കൈയിലുണ്ടാവില്ല. നഗ്നപാദനായിട്ടായിരിക്കും നീ കളിക്കുക. അതുകൊണ്ട് തന്നെ ബൂട്ടില്ലാത്തവൻ' എന്ന വിളി പലപ്പോഴും കേൾക്കേണ്ടി വരും.

ഗ്രൗണ്ടിലെ ചെളിക്കുളങ്ങളായിരിക്കും നിന്റെ ആദ്യത്തെ എതിർ ഡിഫൻഡർമാർ. അതിനെ നീ എളുപ്പത്തിൽ മെരുക്കിയെടുക്കും. അനായാസം ഡ്രിബിൾ ചെയ്യും. 

ഇപ്പോൾ നീ ഒരു കാര്യം ചെയ്യൂ...

ഈ കത്ത് വായിക്കുന്നത് താത്ക്കാലികമായി നിർത്തൂ...