മെസ്സിയും മലയാളിയും തമ്മിൽ

മെസ്സിയോ ക്രിസ്റ്റ്യാനോയോ? ലോകകപ്പ് വിജയത്തിലൂടെ ലയണൽ മെസ്സി ഈ ചോദ്യത്തിനുള്ള ഉത്തരം നൽകിയിരിക്കുന്നു

- കെ എം നരേന്ദ്രൻ

പാട്ടിൽ യേശുദാസിനെപ്പോലെ എഴുത്തിൽ എം.ടി.യെപ്പോലെ ഫുട്ബോളിൽ ലയണൽ മെസ്സിയാണ് മലയാളികളുടെ സ്വകാര്യ അഹങ്കാരം. പക്ഷേ, മെസ്സി മലയാളി പോയിട്ട് ഇന്ത്യക്കാരൻ പോലുമല്ലല്ലോ എന്ന് നമ്മൾ മലയാളികളെ അറിയാത്ത ഏതെങ്കിലും നാട്ടുകാർ ചോദിച്ചാൽ അതിന് റെഡിമെയ്ഡ് മറുപടിയുണ്ട്: അബദ്ധത്തിൽ അദ്ദേഹം അർജന്റീനയിൽ ജനിച്ചു എന്നേയുള്ളൂ, അദ്ദേഹം ജീവിച്ചതും കളിച്ചതുമൊക്കെ മലയാളികൾക്കിടയിലാണ്.

ക്രിക്കറ്റ് അബദ്ധത്തിൽ ഇംഗ്ലണ്ടിൽ ജനിച്ചുപോയ ഇന്ത്യൻ കളിയാണ് എന്ന ആഷിഷ് നന്ദിയുടെ വാക്യത്തെ ഓർമിപ്പിക്കുന്ന മറുപടി. ഇങ്ങനെയൊരു വികാരാതിരേകം മലയാളികൾക്ക് മെസ്സിയോട് ഉണ്ടെന്ന് മെസ്സി അറിഞ്ഞിട്ടേയില്ല എന്നതൊന്നും മലയാളികൾക്ക് പ്രശ്നമേയല്ല. യൂറോപ്യൻ ക്ലബ്ബ് ഫുട്ബോളിൽ അദ്ദേഹം നേടുന്ന ഓരോ ഗോളും മലയാളികൾക്ക് വേണ്ടിയാണ്.

തുടർച്ചയായി അദ്ദേഹം ലോകകപ്പ് വേദികളിൽ പരാജയപ്പെട്ടപ്പോൾ നാം മെസ്സിയെ മാത്രമല്ല നമ്മളെത്തന്നെ പഴിച്ചു. ഒടുവിൽ ഇക്കഴിഞ്ഞ കൊല്ലം മെസ്സി ഫിഫ ലോകകപ്പും മലയാളികൾക്കായി നേടിത്തന്നു. സുരക്ഷയ്ക്കായി അത് തത്കാലം അർജന്റീനയിൽ സൂക്ഷിക്കുന്നു എന്നേയുള്ളൂ, കപ്പ് മലയാളികൾക്ക് കിട്ടിയതാണെന്നതിൽ കേരളത്തിൽ തർക്കമുണ്ടാവില്ല.

ഇക്കാര്യത്തിലേ തർക്കമില്ലാത്തതുള്ളൂ. തർക്കമില്ലാതെ മലയാളി ഇല്ല എന്നോർക്കണം. മറ്റൊരു വലിയ തർക്കത്തിന്റെ മധ്യത്തിലാണ് നമ്മൾ മെസ്സിയെ പ്രതിഷ്ഠിച്ചിട്ടുള്ളത്. മെസ്സിയോ ക്രിസ്റ്റ്യാനോ റൊണാൾഡോയോ ആരാണ് കേമൻ എന്നതാണ് തർക്കവിഷയം. ഈ തർക്കം വാസ്തവത്തിൽ ഈ രണ്ടുപേരുടെ ശൈലികളെ താരതമ്യപ്പെടുത്താൻ വേണ്ടി മാത്രമല്ല. നമ്മൾ മലയാളികൾ ഏത് കാര്യവും മനസ്സിലാക്കുന്നതു പോലും അതോ ഇതോ എന്ന ബൈനറി തർക്കത്തിലേക്ക് ആ കാര്യത്തെ  എത്തിച്ചാണ്. മോഹൻലാലിന്റെ അഭിനയത്തെക്കുറിച്ച് ഒരാൾ ഒരു അഭിപ്രായം പറഞ്ഞാൽ പക്ഷേ, മമ്മൂട്ടി അങ്ങനെയല്ലല്ലോ” എന്ന അഭിപ്രായം അരനിമിഷത്തിനുള്ളിൽ വരും. എൽ.ഡി.എഫ്.- യു.ഡി.എഫ്. തർക്കത്തിന്റെ ഭാഷയിലേ മലയാളികൾക്ക് രാഷ്ട്രീയം മനസ്സിലാവൂ. അതു പോലെത്തന്നെ മലയാളികൾക്ക് മെസ്സിയുടെ ഫുട്ബോൾ മനസ്സിലാവാനുള്ള എതിർ ശക്തിയായി ക്രിസ്റ്റ്യാനോ റൊണാൾഡോ വന്നു.